DILI, 24 juñu 2021 (TATOLI)—Komisaun Anti Korrupsaun (CAC siglá portugés), iha primeiru no segundu trimestre hahú hosi fulan janeiru to’o juñu, liuhosi Diresaun Investigasaun, investiga ona kazu korrupsaun hamutuk 52.
Kazu hirak-ne’e mai hosi delegasaun Ministériu Públiku (MP), relatóriu finál CAC remesa ona ba iha MP hamutuk kazu 13 no daudaun ne’e investigadór CAC sei investiga hela kazu 39.
Notísia relevante:Prosesu kontratu ró Tranship II, CAC aprezenta notísia krime ba MP
“CAC investiga ema hamutuk na’in 203, sasin 177, kompostu hosi mane 133 no feto 44. Investigadór CAC nian mós investiga suspeitu hamutuk na’in 26 kompostu hosi mane 23 no feto na’in-tolu,” CAC haktuir liu hosi komunikadu ne’ebé Tatoli asesu, kinta ne’e.
Hafoin kompleta prosesu investigasaun kriminál, CAC halo relatóriu finál ba MP no prokuradór titulár sira hodi halo apresiasaun, deside arkiva, kontinua halo akuzasaun hodi promove atu hala’o julgamentu iha Tribunál primeira instánsia.
Suspeitu-sira sei sai nafatin ema inosente ka Tribunál tane-as prinsípiu prezunsaun inosénsia molok juiz hatún desizaun finál liu hosi julgamentu.
Antes ne’e, Komisáriu CAC, Sérgio Hornai hateten kazu sira ne’ebé investiga ho tipu krime korrupsaun hanesan administrasaun danoza, abuzu podér, pekulatu, partisipasaun ekomonia ho sira-seluk, ne’ebé iha indísiu akontese iha liña ministeriál no instituisaun Estadu balun.
Ba kazu ne’ebé seidauk finaliza prosesu, CAC kontinua halo investigasaun kle’an hodi hetan prova tanba ho kompleksidae, hafoin ekamiña ba parte relevante.
CAC mós halo koordenasaun informasaun instituisionál ho Prokuradór Jerál Repúblika (PJR), no majistradu prokuradór titulár ba kazu ne’ebé CAC remesa daudaun ba MP, halo hela diskusaun atu bele forma konviksaun loloos, hodi bele promove akuzasaun.
Jornalista: Nelson de Sousa
Editór: Cipriano Colo
