DILI, 29 juñu 2021 (TATOLI)—Inspetór Jerál Autoridade Inspesaun Fiskalizasaun Atividade Ekonómika, Sanitária no Alimentar (AIFAESA), Ernesto Monteiro, hateten, parte autoridade halo ona prosesu ba operaadór ekonómiku ne’ebé hasa’e folin sasán.
“Ha’u laiha dadus operadór ekonómiku hira mak komete irregularidade, maibé sira ne’ebé komete ami prosesa ona hodi bele kumpre no fó presu justu ba konsumidór,” Inspetór Jerál informa ba Agência TATOLI, via telefónika, tersa ne’e.
Antes ne’e AIFAESA halo inspesaun no hosi atividade ne’e deteta operadór ekonómiku balun hasa’e folin la razoavel.
Inspetór Jerál haktuir, durante halo inspesaun iha munisípiu, nota katak loja balun hasa’e maka’as folin materiál kontrusaun no nesesidade bázika.
“Iha Liquiçá, ami detekta iha loja balun hasa’e folin sasán 40% to’o 150%, foos iha munisípiu ne’e sa’e to’o $14,50 to’o $16,50 no iha Dili mós nune’e maibé ami prosesa ona,” nia akresenta.
Relatóriu ba atividade ne’e, AIFAESA sei submete ba Ministériu Koordenadór Asuntu Ekonómiku (MKAE) iha tempu badak nia laran.
“Ami rekolla hotu ona rezultadu inspesaun sira no parte Ministériu Koordenadór Asuntu Ekonómiku husu atu hatama relatóriu inspesaun ne’e iha tempu badak, tanba ne’e sei esforsu,” nia hatutan.
Jornalista : Natalino Costa
Editora : Julia Chatarina
