BAUCAU, 07 jullu 2021 (TATOLI)–Pasiente no Pesoál Saúde iha izolamentu COVID-19 ba inan isin-rua, iha Sentru Klínika Maternidade Ria-Mare Bahu, munisípiu Baucau, hetan atake no ameasa hosi joven ida ho kondisaun lanu, iha tuku 19:00 resin, tersa kalan.
Sasin no Parteira, Teresa Cárceres Belo, haktuir, joven ne’e loke hotu pasiente sira-nia kuartu hodi hakilar haruka ema iha laran sai.
“Nia tama ba sala izolamentu no loke hotu odamatan, pasiente sira ne’ebé toba hela, hadeer no pániku, hafoin nia ameasa pesoál saúde na’in-tolu haruka sai hosi fatin ne’e no bainhira la sai sei bolu nia maluk sira atu sobu maternidade,” Sasin informa, iha fatin akontesimentu, Sentru Klínika Maternidade Ria-Mare Bahu, munisípiu Baucau, kuarta ne’e.
Tuir Teresa, situasaun ne’e hamosu pániku, tanba ne’e Pesoál Saúde inklui Pasiente telefone direta ba Polísia Nasionál Timor-Leste (PNTL) Eskuadra Baucau Villa.
“Fatuk mai dala-rua, entaun ami tauk no halai tama toba fatin, to’o pasiente sira pániku no lalin sasán atu halai sai, maibé PNTL Eskuadra Baucau villa to’o fali iha fatin hodi hakalma situasaun,” nia konta tuir.
Iha fatin hanesan, Komandante Eskuadra postu administrativu Baucau villa, Inspetór Polísia, Marcelino Fraga, hateten, membru Polísia diretamente hakalma situasaun iha fatin akontesementu.
“Horikalan tuku 19:18, ha’u simu telefone hosi Diretór Klínika Baucau Ria-mare no informa katak iha akontesimentu ida iha fatin izolamentu inan isin-rua, ema deskoñesidu tuda. Ha’u orienta kedas membru ne’ebé pikete kalan hodi mai buka informasaun maibé la identifika suspeitu ruma mak tuda,” Inspetór Polísia hateten.
Nia dehan, maski nune’e, horikalan hafoin akontesimentu, PNTL halo kedas atuasaun hodi halo situasaun hakmatek to’o dadeer no daudaun ne’e monta ona Police line inklui destaka membru na’in-neen hodi asegura fatin izolamentu.
“Deskonfia suspeitu ida ho kondisaun lanu, horikalan buka maibé nia halai lakon no buka laiha, ohin dadeersan bolu nia halo indentifikasaun,” Marcelino hatutan.
Fatin izolamentu pasiente COVID-19 inan isin-rua daudaun ne’e rejista pasiente pozitivu hamutuk na’in-hitu, kompostu hosi bebé foin moris na’in-tolu, inan post operasaun ida, bebé ida fulan sia inklui nia inan pozitivu, hein partu na’in-ida, no inan ida pozitivu.
Enkuantu pesóal saúde iha sentru izolamentu ne’e iha na’in-tolu, parteira rua no médiku ida.
Jornalista : Natalino Belo
Editora : Julia Chatarina
