DILI, 09 jullu 2021 (TATOLI)—Ministru Ensinu Superiór, Siénsia no Kultura (MESSK), Longuinhos dos Santos no Sekretáriu Estadu Arte no Kultura (SEAK), Teófilo Caldas, sesta ne’e halo lansamentu ba apoiu prezervasaun Uma Lulik hodi hametin identidade kultura orijinál Timor nian.
“Kultura ne’e dezenvolve hosi Sekretáriu Estadu Arte no Kultura ne’ebé mak dezempeña hodi prezerva no promove ita-nia kultura. Ne’e signifika katak kultura ne’e importante iha ita-nia país,” Ministru Ensinu Superiór, Siénsia no Kultura (MESSK), Longuinhos dos Santos, hateten liuhosi nia diskursu iha serimónia lansamentu apoiu prezervasaun uma lulik, iha Avenida Portugal, Dili.
Governu lansa programa ne’e hodi apoia Uma Lulik hamutuk 42 no grupu indústria kreativa kulturál hamutuk 13, nune’e kontinua hametin identidade kulturál iha Timor-Leste ho orsamentu rihun $128.
Programa ne’e lansa previstu ona iha programa VIII Governu Konstitusionál, Planu Estrátejiku Dezenvolvimentu Nasionál (PEDN) 2011-2030 no orientasaun hosi Primeiru-Ministru, Taur Matan Ruak.
Ministru Ensinu Superiór, Siénsia no Kultura, Longuinhos dos Santos, hateten Governu apoiu prezervasaun Uma Lulik hamutuk 42 no grupu kulturál komunitária no kontemporanea hamutuk 13 ne’e konsege realiza no bazea ba dekretu Governu númeru 1/2019.
Nia dehan, VIII Governu Konstitusionál sei kontinua apoia grupu ne’ebé hametin kultura, tanba kultura nu’udar identidade no kultura mak eroi ba dezenvolvimentu nasaun nian.
Governante ne’e fó parabéns ba benefisiáriu sira hosi uma lulik nian, grupu komunitáriu no kontemporanea, ne’ebé tulun Governu dezenvolve kultura tantu materiál no immateriál.
Entretantu Sekretáriu Estadu Arte no Kultura, Teófilo Caldas, hateten prezervasaun Uma Lulik importante tebes hodi hametin kultura.
“Governu hakarak valoriza nafatin ita-nia identidade kulturál tanba kultura mak povu, nasaun no Estadu nia hun no abut. Estadu ida, povu ida, no nasaun ida laiha kultura ne’e laiha hún no abut. Ne’e duni ita tenke servisu maka’as atu kontinua valoriza ita-nia kultura,” Teófilo Caldas hateten.
Nia esplika, Governu sei apoia ba grupu sira hodi halo prezervasaun ba Uma Lulik ho faze tolu mak hanesan komunidade sira halo konstrusaun ba uma lisan, halo reabilitasaun inaugurasaun.
Iha parte seluk, Benefisiáriu Uma Lulik, Lari Isi Bua Falu, hosi Munisípiu Baucau, Postu Administrativu Quelicai, Suku Abu, aldeia Daemena, Jeraldo do Santos, sente kontente tanba tempu uluk bei’ala sira mak rai-hela uma lisan no Governu apoia hodi kontinua halo prezervasaun.
“Ami-nia uma lisan dezde harii hosi bei’ala sira maibé invazaun 1975 ne’e, militár indónezia mai sunu mutuk hotu. Tanbá ne’e, ami bei-oan no oan sira mai halibur para kontinua fali ami-nia uma lisan. Tanba uma lisan ne’e, hanesan identidade Timor nian,” nia dehan.
Jornalista : Nelia Fernandes
Editór : Cancio Ximenes
