DILI, 14 jullu 2021 (TATOLI)—Sentru Mídia Investigativu (SMI) fó formasaun kona-ba jornalizmu investigativu ba jornalista no joven sira, nune’e bele deskobre aktu korrupsaun hosi ukun-na’in ka ema responsabilidade laek sira komete.
Koordenadór Sentru Mídia Investigativu (SMI), Atay Alves, hateten formasaun jornalizmu investigativu ba joven sira ne’e atu hametin kualidade jornalizmu iha rai laran liuhosi prodús no públikasaun notísia sira iha meu komunikasaun sosiál sira.
“Razaun hosi formasaun ne’e atu hametin kualidade jornalizmu nian iha rai laran, liu-liu iha publikasaun sira-ne’ebé bele halo indept reporting, tanba baibain ne’e jornalista barak mak hakerek stright news de’it. Entaun, jornalizmu investigativu importante tebes ba joven sira, ho objetivu atu bele identifika ka deteta kazu korrupsaun sira iha Timor-Leste,” Atay Alves informa ba Agência TATOLI, iha Quintal Boot, Dili, kuarta ne’e.
Nia esplika, matéria ne’ebé iha formasaun ba jornalizmu investigativu iha komponente haat, hanesan investigasaun bázika, médiu, avansadu no extraordináriu.
“Investigasaun báziku hanesan, halo investigasaun kona-bá dokumentu korrupsaun, hanesan iha faze dahuluk, oinsá halo investigasaun ba dokumentu nia orijinál. Ne’e investigasaun inísiu sira relasaun ho investigasaun dokumentu ka resivu,” nia dehan.
Purtantu dokumentu investigasaun iha faze médiu ne’e hanesan, dokumentu sira ne’ebé investiga nia kredivelidade iha-ne’ebé, no investigasaun extraordináriu hanesan halo investigasaun ba kazu extraordináriu hanesan korrupsaun sira.
Nia akresenta, sentru formasaun ne’e loke área jerál hanesan multimédia, maibé matéria mak prepara ketak no formasaun ba investigasaun fó ba formandu sira. Atividade ba formasaun ne’e, la’o ona iha fulan-janeiru to’o marsu paradu tanba pandemia COVID-19.
Entretantu, Sentru Média Investigativu (SMI) fó mós formasaun jornalizmu multimédia hanesan jornalizmu, rádiu, televizaun, jornál, online, fotografer, camera man, cool edit pro, no editór vídeo.
Formasaun ne’e ho objetivu atu kontribui ba prosesu konstrusaun Estadu liuhosi atividade, hanesan halo publikasaun notisiáriu, halo formasaun jornalizmu multimédia no investigativu no halo peskiza no estudu ba asuntu jornalizmu.
Totál formandu ne’ebé partisipa iha formasaun hosi inisíu to’o agora hamutuk 150-resin no hosi númeru ne’e formandu 115 maka foti ona sertifikadu no na’in 20 resin mak hetan serbisu iha instituisaun mídia hanesan Dili Post, GMNTV, TVE, Rádiu Televizaun Maubere (RTM), Rádiu Komunidade, Organizasaun Naun-Governamentál (ONG) no mídia officer iha instituisaun Estadu.
Totál formandu ba tinan 2021, hamutuk na’in-15 atu halo estájiu. Hosi númeru ne’e na’in-tolu halo ona estájiu no restante seidauk estájiu. Totál funsionáriu hamutuk na’in-11 kompostu hosi funsionáriu na’in-neen (6) no formadór na’in lima (5).
Jornalista : Nelia Fernandes
Editór : Cancio Ximenes
