MJ-MEJD sei fó oportunidade ba dadur-sira eskola
DILI, 16 jullu 2021 (TATOLI)—Ministériu Justisa (MJ), sei estabelese akordu ho Ministériu Edukasaun Joventuve no Deportu (MEJD), hodi fó oportunidade ba dadur-sira eskola.
“Ami halo ona aprosimasaun ho MEJD atu realiza akordu ida, nune’e estabelese ensinu rekorrente ba dadur-sira,’’ Vise-Ministru Justisa, José Edmundo Caetano, hateten ba jornalista-sira iha Sentru Formasaun Jurídika no Judisiáriu, Caicoli, sesta ne’e.
Notísia relevante:Prizioneiru 539 iha prizaun Becora simu vasina doze dahuluk
Planu Governu liu hosi MJ atu implementa rejime aberta (nakloke) ba dadur sira, ne’ebé kompleta ona kastigu kadeia um terço atu partisipa prosesu apredizazen iha eskola-sira iha liur ka la’ós iha kadeia laran.
Rejime nakloke ne’e fó ba dadur foinsa’e-sira ne’ebé sei iha oportunidade atu eskola, hodi bele prepara sira-nia futuru, tuir nia implementasaun rejime aberta ho serbisu integradu liña ministeriál inkui MEJD.
Oras ne’e daudaun, dadur kondenadu no prizaun preventiva iha prizaun Becora hamutuk 548, prizaun Gleno 111 no prizaun Suai 99.
Jornalista: Nelson de Sousa
Editór: Cipriano Colo
