DILI, 21 jullu 2021 (TATOLI)—Comoro Child and Youth Center (CCYC) realiza formasaun ba joven sira kona-ba kriasaun website rasik, nune’e bele promove internet ne’ebé saudável iha utilizasaun rede sosiál.
Notísia Relevante: SEJD fasilita joven 40 tuir formasaun hospitalidade iha ETDA
“Iha programa website báziku ne’ebé fasilita joven sira, oinsá kada individu bele kria programa website (sítiu) rasik, atu nune’e ema ida-idak bele utiliza website sira-ne’e hodi asesu ba internet saudável,” Jestór Programa Comoro Child and Youth Center, Délio Mali Lopes informa ba Agência TATOLI, iha nia kna’ar-fatin, Comoro, Dili, ohin.
Objetivu prinsipál hosi formasaun atu joventude sira iha kapasidade dezenvolve rasik website no dezeñu rasik.
“Matéria seluk hosi website básiku hanesan desainer gráfiku, ne’e katak formandu sira kria ona sira-nia aplikasaun website, bainhira sira atu públika informasaun ruma iha sira-nia akun refere tenke kredível ka formál,” nia dehan.
Nia informa, formasaun website hahú ona iha fulan outubru 2020 liubá no finaliza ona iha marsu 2021.
Totál partisipante ne’ebé konsege finaliza formasaun no hetan sertifikadu apresiasaun hamutuk ema na’in-15, ne’ebé hala’o formasaun durante fulan neen.
Sentru Juventude Comoro ka Comoro Child and Youth Center (CCYC) ne’e harii iha tinan 2002, ne’ebé inisía hosi timor-oan sira.
Área formasaun ne’ebé eziste iha Sentru Juventude Comoro kompostu hosi lian inglés, portugués, komputadór, Live Skill Basic Education (LSB), website, edukasaun sívika, teatru, desportu ba dame no desportu ba moris.
Nia dehan, iha tinan 2021 formandu sira-ne’ebé tuir formasaun iha sentru formasaun refere hamutuk 281 iha formasaun inglés, portugués, komputadór, Live Skill Basic Education (LSB).
Totál formandu sira-ne’ebé durante tuir formasaun iha Sentru Juventude Comoro hamutuk 1205. Hosi númeru ne’e 10% mak hetan ona serbisu iha instituisaun estadu nian no empreza sira. Enkuantu, totál funsionáriu CCYC hamutuk na’in-17 kompostu hosi funsionáriu na’in-ualu no formadór na’in-sia.
Jornalista : Nelia Fernandes
Editór : Cancio Ximenes
