DILI, 21 jullu 2021 (TATOLI)—Ministru Prezidénsia Konsellu Ministru, Fidelis Manuel Leite Magalhães, hateten, Governu kompromete atribui suplementu remuneratóriu ba pesoál sira ne’ebé konsidera hanesan liña frente no presta servisu ba prevensaun COVID-19.
“Prezidénsia Konsellu Ministru iha knaar halo koordenasaun jerál servisu Governu, hanesan ajuda Primeiru-Ministru no halo esforsu hodi desizaun sira ne’ebé sai hosi Konsellu Ministru bele implementa tuir desizaun ne’ebé halo. Ho ida, ne’e husu ministériu relevante sira atubele implementa tuir dekretu-lei ne’ebé vijente,” Ministru hateten hafoin reuniaun ezekutivu, iha Palásiu Governu, kuarta ne’e.
Antes ne’e, Governu liuhosi Konsellu Ministru aprova Dekretu-Lei kona-ba kriasaun suplementu remuneratóriu ba traballadór iha administrasaun públika, ne’ebé halo atividade profisionál ho kondisaun direta iha servisu prevensaun ka kontrola COVID-19, ne’ebé lejizlasaun ne’e sei prodúz efeitu hahú iha loron 01 abríl 2021.
Notísia relevante: PR husu Governu uza dekretu-lei tuan halo pagamentu ba liña frente
Maski nune’e, Prezidente Repúblika (PR), Francisco Guterres Lú Olo veta lejizlasaun ne’e no husu Governu uza Dekretu-Lei anteriór hodi selu pesoál liña frente.
“Ita rekorre fali ba Dekretu-Lei anteriór ka avansa fali inisiativa ruma ne’ebé presiza iha klareza ida ho lalais, nune’e hakat liu ba oin no la impede direitu funsionáriu sira ne’ebé fó forsa no ariska an ba interese públiku. Entaun Governu presiza dignifika sira-nia servisu no suplementu remuneratóriu ne’e hanesan sinál ida ne’ebé Governu kompromete atu fó apoiu extra ba funsionáriu sira ne’ebé ho vontade tomak hakarak apoiu sidadaun sira,” Ministru subliña.
Notísia relevante: Governu Aprova Suplementu Remuneratóriu ba Profesionál Liña Frente Kada Loron $25
Iha tinan kotuk, Governu estabelese ona suplementu remuneratóriu ba traballadór elijível ho prestasaun atividade profisionál iha servisu prevensaun no kontrola COVID-19, hanesan médiku, forsa, polísia, tékniku eletrisidade, jornalista no seluk tan, ho remunerasaun la hanesan, depende ba risku servisu ne’e rasik.
Jornalista : Antónia Gusmão
Editora : Julia Chatarina
