DILI, 27 jullu 2021 (TATOLI)—Fasilitadór Programa Rotary Youth Leadership Award (RYLA), Gerson Ferreira da Serra, informa durante pandemia COVID-19 no implementasaun serka sanitaria ne’e RYLA fó apoiu umanitáriu ba komunidade hamutuk 1000-resin.
Notísia Relevante: Konferénsia RYLA, Alberto: “Foinsa’e Aprende Toma Responsabilidade”
“Durante iha situasaun pandemia Covid-19, ami fó apoiu ba vendedór ambulante no apoiu mós ba komunidade ne’ebé hela iha Dare, Metinaro, Hera, Tibar, inklui mós iha Díli,” Gerson Ferreira da Serra hateten ba Agência Tatoli, iha nia knaar fatin, Balide, Díli, ohin.
Iha munisípiu Díli, RYLA fó apoiu ba komunidade ne’ebé hela iha Bairru Pite, Vila Verde, Comoro, no Becora.
Bainhira COVID-19, hahú tama iha Timor-Leste iha tinan 2020, momentu ne’ebá RYLA mós konsege para tiha atividade tanba situasaun balun ne’ebé presiza duni apoiu, entaun iha inisíu Estadu Emergênsia iha tinan 2020, RYLA konsege halo apoiu emergênsia ba pakote ai-han dala haat no iha inisíu hosi COVID-19 tama mós RYLA konsege fó apoiu ekipamentu prevensaun COVID-19 liuhosi fahe máskara, luvas no handanitizer ba komunidade sira.
Aleinde ne’e, RYLA fahe mós apoiu equipamentu prevensaun COVID-19 ba eskola primária ne’ebé lokaliza iha Munisípiu Dili no Baucau.
“Eskola primária iha Munisípiu Díli, ne’ebé lokaliza iha Akadiru-Hun nian, ami konsege tau tanke rua ba estudante sira hodi utiliza ba fase liman inklui sabaun no hand sanitizer. Ba apoiu iha Baucau, ami la to’o direta ba iha sira-nia eskola maibé ami haruka tuir transporta mak lori ba, hanesan tanke rua, sabaun, hand sanitizer tanbá momentu ne’ebá sei bandu, labele halo viajen ba munisípiu sira,” nia informa.
Iha tinan 2021, bainhira Governu aplika fali serka sanitária, RYLA halo atividade aumenta hanesan fó apoiu ba vítima dezastre natural hanesan família afetadu inundasaun nian no apoiu ai-han iha situasaun COVID-19.
“Ami apoiu ba vítima inundasaun nian, ami apoiu uluk ba estudante sira-ne’ebé hela kost iha Díli laran, ne’ebé susar ba ai-han. Tanba, ami haree mós preokupasaun ne’ebé kuaze ema barak mós haree, entaun ba estudante ne’ebé la konsege hetan apoiu, ami mós konsege fó apoiu uitoan ba sira,” nia informa.
Hafoin ne’e, RYLA mós fó apoiu ba komunidade iha uma kain balun ne’ebé RYLA konsege halo atividade ne’e hosi kedas iha fulan-marsu to’o fulan-juñu. Hosi atividade sira ne’e, ikus liu iha semana rua kotuk liubá, RYLA konsege halo atividade dala-hitu.
Atividade fó apoiu ai-han, hanesan fós, mina, supermie no sasán ijiene nian hanesan rinso, sabaun, hand sanitizer.
Entretantu, atividade ba apoiu umanitáriu iha situasaun COVID-19 no Inundasaun, RYLA konsege fó apoiu ba familia kuaze 1000-resin. Atividade apoiu ne’e, RYLA hetan apoiu hosi “Sunrise Joint Venture” hanesan RYLA Timor-Leste nia doadór prinsípál ba programa hotu, inklui mós hetan apoiu fundu balun hosi Rotary District 9685 no Rotary District 9550.
Notísia Relevante: Sai lideransa lalika buka “buat fasil” maibé buka “buat difisil”
Jornalista : Nelia Fernandes
Editór : Cancio Ximenes
