DILI, 29 jullu 2021 (TATOLI)—Sentru Formasaun Fundasaun Hadomi Timor oferese formasaun ba estudante ativu sira, nune’e hasa’e sira-nia koñesimentu iha área oioin.
Diretór Ezekutivu Sentru Formasaun Fundasaun Hadomi Timor, Abrão Monteiro, esplika sentru ne’e oferese formasaun ba estudante ativu sira ho objetivu atu hasa’e kapasidade hodi aumenta sira-nia esperiénsia.
“Ami-nia sentru formasaun ne’e atu ajuda estudante ativu sira-ne’ebé sei eskola hela, ho nune’e bele aumente sira-nia kapasidade no la’ós ba ema sira-ne’ebé ramata ona eskola atu buka servisu. Tanba, ami haree eskola ladún oferese matéria prátika di’ak ba sira, ho nune’e ami loke formasaun ida-ne’e,” Abrão Monteiro informa ba Agência TATOLI, iha nia kna’ar-fatin, Farol, Dili, kinta ne’e.
Nia informa, formasaun ne’e diferensa ho formasaun sira seluk, tanba formasaun seluk halai liubá oinsa atu kria empregu. Maibé, iha sentru formasaun Fundasaun Hadomi Timor diferensa tanba seidauk orienta, bainhira formandu sira ramata formasaun ba kedas kompete servisu.
“Ezemplu, iha eskola ba área informátika, sira seidauk prátika di’akliu ba iha área informátika nian, ami bele ajuda hodi nune’e sira bele prátika iha ami-nia fatin. No ami seidauk garante depois ramata formasaun nia tenke ba servisu,” nia dehan.
Sentru Formasaun Fundasaun Hadomi Timor, iha programa ida bolu IT Smart Akademi, ne’ebé ho nia
durasaun fulan-hitu ne’e fulan-lima sira kursu regulár no fulan-rua ba estájiu.
“Ezemplu, hanesan estudante sira ramata ona sira-nia eskola, sira bele tuir ami-nia formasaun IT Smark depois remata ami orienta sira ba estájiu iha fatin seluk. Karik iha-ne’ebá interesante hanesan sira atitude di’ak no kontribui di’ak, sira mós bele hetan kontratu iha fatin servisu,” nia akresenta.
Sentru Formasaun Hadomi Timor hahú iha tinan 2013, ne’ebé fó formasaun jerál, tanba sentru ne’e rasik ho hanoin koko, introdús fali formasaun foun ho matéria espésifiku.
“Iha komputadór nian, karik nia área ba saida, hanesan atu aprende data analises, microsoff office, desaing ka editing video\, networking, data base no websside ruma,” nia informa.
Nia dehan, sentru ne’e rejista iha INDIMO iha 2015 no daudaun ne’e iha ona sertifikadu INDIMO nian, maibé seidauk akredita iha área balun.
Área formasaun iha sentru formasaun ne’e mak hanesan IT Smark Informátika, Aplikasaun komputadór jerál, lian Inglés, Portugués, Korea, Administrasaun no Finansa, Konstrusaun Sívil, Arkitetura, Accounting, no Data Analysis.
Totál partisipante hosi 2013 to’o 2021 produs hosi Sentru Formasaun Hadomi Timor hamutuk 1.000 resin.
Entretantu, totál formandu 2021 hamutuk 100-resin no formandu hirak-ne’e mai mai hosi estudante no funsionáriu públiku sira.
Totál funsionáriu no formadór hamutuk na’in-13, mai hosi espériensia hosi kada área iha formasaun ne’e, no maioria esperiénsia hosi informátika (IT).
Jornalista : Nelia Fernandes
Editór : Cancio Ximenes
