iklan

DILI, EDUKASAUN, HEADLINE

ETBU oferese formasaun ba Ema Defisiénsia Matan ho “Talking Software JAWS”

ETBU oferese formasaun ba Ema Defisiénsia Matan ho “Talking Software JAWS”

Diretór Ezekutivu East Timor Blind Union (ETBU), Jacinto Pereira. Imajen Tatoli/Nelia Fernandes.

DILI, 04 Agostu 2021 (TATOLI)—East Timor Blind Union (ETBU) nu’udar asosiasaun ida daudaun ne’e oferese formasaun ba Ema ho Defisiénsia (EhD) Matan, atu bele asesu ba kualkér informasaun.

Diretór Ezekutivu East Timor Blind Union (ETBU), Jacinto Pereira, informa atividade formasaun komputadór ba ema ho defisiénsia matan ne’e, oferese ba sira-ne’ebé mai hosi munisípiu 12 no Rejiaun Administrativa Espesiál Oe-Cusse Ambeno (RAEOA) ho programa Talking Software JAWS.

“Formasaun ne’e liuhosi programa Talking Software “JAWS” Hel Visual Impaired Students. Ezemplu, orsida ita ketik iha letra A karik nia bele temi A. Se ita hakarak lee fali fraze ida-nia bele lee, ne’ebé doftware ne’e iha kompletu ona. Hanesan atu lee no hakerek nian, nia fó sai iha ne’ebá kompletu,” Jacinto Pereira informa ba Agência TATOLI, iha nia kna’ar-fatin, Becora, Dili, tersa ne’e.

Nia esplika, formasaun ne’e realiza nune’e ema defisiénsia matan sira bele asesu iha mídia liuhosi uza whatshaap, asesu ba facebook no email.

“Matéria ne’ebé sira aprende iha formasaun báziku nian, liu-liu iha word nian mak oinsá sira atu ketik. Primeiru ita halo uluk introdusaun komputadór nian ba sira, hafoin ita fó koñesimentu ba sira iha parte keyboard nian. Hanesan letra A, B no C nia pozisaun iha-ne’ebé, nune’e sira dekor tiha, hafoin sira bele ketik mesak,” nia dehan.

Totál ema ho defisiénsia matan ne’ebé tuir formasaun iha programa vokasionál, liu-liu iha komputadór nian hamutuk na’in-30.

East Timor Blind Union (ETBU), hanesan asosiasaun ida-ne’ebé estabelese iha loron 04 janeiru tinan 2004, ne’ebé funda hosi ema na’in-haat ho objetivu luta ba injustisa sosiál no hasai maluk defisiénsia matan sira hosi anafabetizasaun.

Nune’e iha East Timor Blind Union (ETBU) ne’e iha programa lubuk ida, ne’ebé asosiasaun ne’e halo ba ema defisiénsia matan hanesan fó formasaun letra braille, mobilidade, lian portugués, inglés, vokasionál, hanesan komputadór no halo mós advokasia ba públiku.

“Ita fó formasaun ne’e ba sira atu sira hatene rasik, labele depende ba ema seluk. Hanesan bainhira sira la’o mesak uza ai-tonka (stick) iha fatin públiku nian,” nia dehan.

Entretantu, totál membru defisiénsia matan iha East Timor Blind Union (ETBU) hamutuk 3000, maibé ba formasaun nian kada tinan sempre fó formasaun ba ema nai’n-30.

Totál formadór hosi East Timor Blind Union (ETBU) hamutuk na’in-20, mai hosi maluk defisiénsia matan mós, hanesan sira-ne’ebé iha esperiénsia ona

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!