DILI, 06 agostu 2021 (TATOLI)—Tribunál Distritál Dili (TDD), liuhosi dezisaun ba prosesu providénsia kautelár restitui pose rai provizóriu ba rekerente, Sebastião da Silva, ne’ebé antes ne’e hetan despezu ba konstrusaun edifísiu foun kuartél Polísia Nasionál Timor-Leste (PNTL), iha Caicoli, munisípiu Dili.
Advogadu Privadu, Olívio Barros, hateten razaun fundamentál desizaun Tribunál nian tanba asaun ba kritéria providénsia kautelár prienxe duni elementu tolu hanesan, primeiru rekerente iha pose uza hela rai ne’ebé ho dokumentu komprovativu.
Notísia relevante:TDD julga providénsia kautelár ba rai konstrusaun edifísiu PNTL
Segundu, asaun ne’ebé Estadu atu foti obriga ho forsa la’ós ho konsientemente hosi rekerente no eziste hanesan ho violentu ba halo despezu laiha informasaun antes, maibé ho derrepente.
Terseiru, testemuña-sira ne’ebé rekerente aprezenta, Tribunál haree informasaun hatudu kritéria tolu prienxe duni, tanba rekerente hela kleur durante utiliza rai hodi halo uma no kuda ai-horis.
“Nune’e Tribunál deside dekreta restitui pose provizóriu ba rekerente hodi fó fila-fali rai ne’ebé Estadu foti,’’ Olivio Barros, hateten ba jornalista Agência Tatoli, via telefónika, sesta ne’e.
Nia esplika, asaun providénsia kautelár ne’ebé parte rekerente hato’o tanba rekeridu (Estadu) foti rai ho obriga, nune’e ho desizaun Tribunál asaun rekeridu nian la loos.
Tribunál sei notifika fila-fali desizaun ba iha parte Estadu liuhosi Ministériu Justisa hosi Diresaun Nasionál Terras no Propriedade (DNTP) no PNTL bainhira la aseita bele halo rekursu dentru prazu loron sanulu.
Tribunál sei termina loron iha tempu badak, atu akompaña rekerente hodi sobu fila-fali lutu ne’ebé antes hetan despezu.
“Kona-bá prejuizu ne’ebé rekerente hetan hanesan ai-horis, uma, moru ne’ebé suru, parte defeza sei hatama fali asaun prinsipál iha julgamentu tuir-mai,” nia subliña.
Tanba ne’e, hosi advogadu rekerente sei hatama asaun prinsipál tuir prazu ne’ebé iha, hodi halo fila-fali julgamentu normál tuir-mai atu deside loloos rai ne’e na’in komunidade ka Estadu.
Jornalista: Nelson de Sousa
Editór: Cipriano Colo
