DILI, 11 agostu 2021 (TATOLI)— Reprezentante estudante universidade sira iha Timor-Leste, kuarta ne’e, iha Palásiu Prezidensiál, Dili, hasoru malu ho Prezidente Repúblika (PR), Francisco Guterres “Lú Olo” hodi aprezenta sira-nia espresaun ladún kontente ho programa Governu nian fahe pulsa internet ba estudante sira atu eskola online, maibé estudante sira konsidera la efetivu.
Hafoin audiénsia ho Prezidente Repúblika, portavós estudante universidade sira, Revelino Elias Guterres, hateten Governu impoin alternativu virtuál maibé la efetivu.
“Governu konsege impoin alternativa eskola virtuál ka eskola online, maibé ida-ne’e la efetivu tanba estudante barak mak la asesu tanba kestaun limitasaun ekonomia atu sosa handphone ka smartphone,” Revelino Elias Guterres afirma.
Reprezentante estudante universidade sira-ne’e mós aprezenta ba Prezidente Repúblika kona-bá problema sosiál no ekonomia ligadu ho situasaun pandemia COVID-19 no aplikasaun Estadu Emerjensia, Serka Sanitária no Konfinamentu Obrigatóriu durante ne’e.
“Kestaun sira-ne’e hato’o ba ita-nia Prezidente Repúblika atu oinsá mak Prezidente Repúblika bele utiliza nia kompeténsia hatutan aspirasaun sira-ne’e ba órgaun no ministériu relevante sira hodi solusiona lalais para responde ba problema ne’ebé mak ami no povu enfrenta,” nia tenik.
Reprezentante universitáriu sira-ne’e mai hosi munisípiu 12, ho mós Rejiaun Administrativu Espesiál Oé-cusse Ambeno (REAOA).
Rona tiha preokupasaun sira-ne’e, Prezidente Repúblika (PR) hateten kestaun hirak-ne’e la’ós kauza hosi pandemia globál COVID-19 maibé polítika ne’ebé la konsege prepara ho di’ak dezde Timor-Leste ukun rasik-an.
Iha fatin hanesan, Costantinho de Jejus hatutan, polítika Governu atu fó subsídiu no pulsa gratuita, maibé kona-ba propina ladún iha problema tanba bele aloka diretamente tuir lista ne’ebé aprezenta husi administrasaun.
“Problema uitoan iha pulsa internet gratuita nian tanba estudante barak mak la asesu inklui ha’u rasik la hetan pulsa hosi operadór Timor Telecom, Telkomcel ho Telemor,” Costantinho fó sasin.
Rona tiha preokupasaun sira-ne’e, Prezidente Repúblika, Francisco Guterres “Lú Olo” husu ba reprezentante estudante husi universidade sira-ne’e atu tulun Estadu iha kombate COVID-19 liuhosi sosializasaun Programa Vasinasaun Nasionál ba família sira, atu nune’e, bele tama fali ba normalizasaun foun.
Prezidente Repúblika informa katak Estadu halo daudaun esforsu ba normalizasaun situasaun liuhosi hasa’e persentajen vasina iha Timor-Leste liu 70%, atu nune’e, sidadaun ida-idak bele livre hala’o nia atividade hanesan baibain.
“Ha’u husu ba imi, estudante sira, atu sosializa vasina ba imi-nia inan-aman no família atu tuir vasina. Ne’e dalan atu bele salva sidadaun hotu-hotu iha luta hasoru Covid-19,” Prezidente Repúblika hateten ne’ebé sita iha pájina Facebook ofisiál Presidência da República Democrática de Timor-Leste
Prezidente Repúblika hateten katak bainhira Covid-19 mosu no Organizasaun Mundiál Saúde deklara nu’udar pandemia global Estadu Timor-Leste foti medida oioin atu prevene no kontrolu propagasaun virus SAR-CoV-2. Tanba ne’e dezde rejista kazu konfirmadu ho COVID-19 iha Dili, iha marsu 2020, Prezidente Repúblika deklara estadu emerjénsia hodi salva sidadaun hotu-hotu hosi kalamidade públika ne’ebé bele mosu hosi COVID-19.
Deklarasaun estadu emerjénsia suspende direitus no liberdade ne’ebé garante iha Konstituisaun RDTL no hamosu efeitu sosiál no ekonomia ba sidadaun nia moris. Prezidente Repúblika hateten katak Estadu halo esforsu tomak atu salva saúde públika no pandemia ne’e lori lisaun ba Timor-Leste atu investe liután atu hametin kapasidade nasionál.
Jornalista : Osória Marques
Editór : Francisco Simões
