DILI, 19 agostu 2021 (TATOLI)—Konselhu Diretiva Nasionál Auditória Sosiál (KDNAS), fó formasaun metodolojia peskiza no analiza dadus ba numeradór na’in–14 iha Asosiasaun Halibur Defisiénsia Matan Timor-Leste (AHDMTL).
Notísia Relevante: AHDMTL fó formasaun Letra Braille ba ema defisiénsia matan
Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso hateten, iha 09 agostu, nia parte halo abertura ba formasaun numeradór ba metodolojia peskiza no analiza dadus ba formandu na’in-14, ne’ebé AHDMTL hetan apoiu hosi UNICEF no fasilitadór mai hosi KDNAS.
“Tanba sira iha peritu ba ida-ne’e, entaun ita servisu hamutuk ho sira no bolu sira mai fasilita ba ita-nia númeradór sira. Ida-ne’e ita-nia lansamentu no iha tempu badak ita mós sei distribui sertifikadu ba numeradór sira-ne’e,” Gaspar Afonso hateten ba Agência Tatoli, iha nia knaar-fatin, Manleuana, Dili, kinta ne’e.
Iha formasaun ne’e, numerador sira aprende oinsa entry data no analiza dadus, tanba AHDMTL hakarak iha data base (baze adus) ida báziku maibé detalladu no adekuadu.
“Ida ne’e mak ita bolu fasilitadór mai fó formasaun no agradese ba UNICEF bele apoiu ita ba asuntu ida-ne’e,” nia dehan.
Objetivu espesifiku hosi formasaun ne’e, nia dehan, AHDMTL hakarak iha dadus konkretu ba ema ho defisiénsia matan iha territóriu Timor-Leste.
“Numeradór sira aprende tiha hosi formasaun ne’e, sira sei tun ba munisípiu tolu hanesan Ermera, Liquiça no Bobonaro, hodi halo peskiza no rekolla dadus ba ema ho defisiénsia matan iha Timor,” nia informa.
Dadaun ne’e, formasaun ne’e termina ona maibé hein fali faze tuir mai, AHDMTL sei ba halo preliminária ho autoridade lokál sira, hafoin ne’e ba faze terseiru numeradór sira sei tun ba foti dadus.
Bainhira atu ba halo preliminária ho autoridade lokál, AHDMTL sei submete relatóriu ho pedidu ba UNICEF, tanbá osan ne’ebé UNICEF fó la mai direta iha konta AHDMTL nian maibé tuir kada programa.
“Ita submete tiha relatóriu ba UNICEF, sira haree hanusa tiha, hafoin sira fó fali pedidu preliminária nian mai, hodi ita ba halo fali preliminária. Depois fila-fali mai, ita submete fali relatóriu ba sira. Hafoin ne’e, sira foin fó fali apoiu ida terseiru hodi ita tun ba rekolla dadus iha munisípiu,” nia dehan.
Entretantu totál fundus ne’ebé UNICEF apoiu ba formasaun ne’e ho orsamentu $3,710 no formandu na’in-14 ne’ebé tuir formasaun mai hosi ema defisiénsia matan no ema lahó defisiénsia.
Totál dadus hosi Asosiasaun Halibur Defisiénsia Matan Timor-Leste (AHDMTL), iha tinan 2011 to’o 2021 ne’e, ema defisiente matan hamutuk 277 ne’ebé kompostu hosi feto na’in-132 no mane na’in-145.
Jornalista : Nelia Fernandes
Editór : Cancio Ximenes
