EBC Suai Loro menus fasilidade
COVALIMA, 23 agostu 2021 (TATOLI)-Eskola Bázika Sentrál (EBC) Suai Loro, Postu Administrativu Suai Villa, menus fasilidade no sala ba aula nian.
“Ami la iha fasilidade, hanesan meza no kadeira la sufisiente, la iha biblioteka no sala la sufisiente hodi akumula estudante sira, tanba ne’e ami fahe turnu dadeer no loro-kraik,” diretór EBC Suai Loro, Francisco Gonçalves Babo, informa ba Agência Tatoli iha EBC Suai Loro, segunda ne’e.
Governu liuhosi Ministériu Edukasaun presiza halo reabilitasaun sala ba aula nian lima (5) ho biblioteka, atu nune’e bele fasilita ensinu aprendizajen ba estudante hamutuk 722.
Diretór Ministériu Edukasaun Munisípiu Covalima, Edmundo Pereira, klarifika eskola bázika sentrál (EBC) tau ona iha planu, maibé depende orsamentu.
“Ami tau ona orsamentu tinan 2022 hein atu aprova hosi Ministériu Edukasaun liu hosi diresaun apoiu infra-estruturál Ministériu. Ami mós identifika duni atu halo reabilitasaun,” Edmundo Pereira hateten.
Jornalista : Celestina Teles
Editór : Francisco Simões
