CTID Canossa Baucau kapasita joven feto ho “maestra di campagna”
DILI, 24 agostu 2021 (TATOLI)—Diretora Centro Treinamento Integrál no Dezenvolvimento (CTID) Canossa Baucau, Me. Maria Filomena da Costa Freitas, hateten daudaun ne’e CTID ne’e fó hela formasaun ba joven feto sira iha área maestra di campagna.
“Ami–nia formasaun ba programa maestra di campagna katak formandu sira sai mestre ba iha sira–nia suku rasik. Formandu sira mai aprende tiha iha ne’e, bainhira sira iha ona esperiénsia sira bele hanorin fila–fali ba sira–nia maluk sira iha suku,” Me. Maria Filomena da Costa Freitas, hateten ba Agência Tatoli, liuhosi teléfonika, tersa ne’e.
Formasaun ba programa maestra di campagna, fó prioridade ba feto sira-ne’ebé mai hosi área rurál, atu hasa’e sira-nia koñesimentu, atu nune’e sira bele fahe fali ba ema seluk.
“Objetivu hosi formasaun ne’e, atu hasa’e abilidade joven sira–nian, liu-liu ba sira-ne’ebé iha área rurál, nune’e matéria ne’ebé sira aprende, sira bele aplika fila–fali iha sira–nia fatin,” nia dehan.
Formasaun ba programa maestra di campagna ne’ebé sentru ne’e fó iha departamentu tolu hanesan iha kuliñaria, kustura no administrasaun.
“Iha departamentu kuliñaria nian, ami hakarak forma joven feto sira iha área rurál, entaun hahú hosi hahan produtu lokál, uza hosi manuál to’o eletrónika. Hanesan, bainhira sira halo dose karik, hahú hosi kripik sira halo ho hudi no fehuk, enkuantu halo dosi sira bele uza lakeru, hodi halo dose no pudding. Formasaun ne’e, ami hahú hosi hahan produtu lokál, hafoin ne’e mak ba fali hahan modernu nian,” nia dehan.
Iha kustura nian, matéria ne’ebé fó hanesan oinsá suku bluja, saia, vestidu, no aprende suku kalsa, no área administrasaun ne’e sira estuda kona-ba administrasaun nian.
Formandu sira-ne’ebé tuir formasaun iha programa maestra di campagna hamutuk na’in–58, no atividade formasaun kontinua la’o hela maibé partisipante sira nafatin kumpre regra hosi Ministériu Saúde, hanesan fase liman, uza maskára no halo distansiamentu sosiál.
Totál formandu ba tinan ne’e hamutuk na’in–87, kompostu hosi programa maestra di campagna hamutuk 58, no programa ospitalidade iha na’in–29 no hosi númeru ne’e formandu sira mai hosi joven no balun kaben na’in.
Sentru ne’e harii iha tinan 2000, ne’ebé funda hosi Madre Sonia Sangel ema Filipina. Área formasaun iha sentru ne’e iha programa rua, ba programa dahuluk hanesan programa maestra di campagna iha departamentu tolu hanesan kuliñaria, kustura no administrasaun, no mós iha programa ospitalidade ho totál formadór hamutuk na’in–20.
Jornalista : Nelia Fernandes
Editór : Cancio Ximenes
