DILI, 06 setembru 2021 (TATOLI) – Tékniku Sosiál Destakadu Ministériu Solidariedade Sosiál no Inkluzaun (MSSI) Munisípiu Liquiça iha Postu Administrativu Bazartete, Ivonia Zulmira hateten, atividade ne’ebé sira hala’o ministériu hanaran re-prodús ka rekollamentu dadus ba populasaun sira ne’ebé ho problema sosiál no rekursu potensiál.
“Ami funsionáriu destakadu iha postu administrativu sira halo servisu rekolla dadus ba uma-kain sira ne’ebé mak ho problema bem-estar sosiál nian. Atu nune’e ministériu bele iha dadus ida ne’ebé adekuadu hodi prepara ba planu tinan oin mai,” Ivonia Zulmira ba Agência Tatoli via telefónika, segunda ne’e.
Nia dehan, dadus ne’e atu arkivu mós iha suku ida-idak atu fasil ba nasionál sira bele kontrola no hatene kada suku sira nia problema.
Programa ne’e, hala’o durante fulan tolu (3) hahú hosi agostu to’o outubru no agora daudaun funsionáriu destakadu tolu iha postu administrativu tolu lao hela iha terrenu, hanesan Bazartete, Liquiça Vila ho Maubara.
Jornalista : Hortencio Sanchez
Editór : Francisco Simões
