DILI, 07 setembru 2021 (TATOLI)—Sentru Formasaun Polísia (CFP sígla portugés), kapasita membru Polísia Nasionál Timor Leste (PNTL) iha munisípiu Liquiça, ne’ebé ho kargu fefia hanesan komandante Eskuadra no Xefe seksaun.
Kapasitasaun ne’e kona-bá jestaun ho lideransa, tékniku profesionál inklui lei no regulamentu lideransa eskuadra iha terrenu, prepara planu operasaun, implementasaun no ezekusaun planu operasionál hosi komandu munisípiu.
Notísia relevante:CFP sei kapasita membru PNTL 1.200
“Kapasitasaun ba ofisiál sarjentu-sira iha munisípiu Liquiça ne’ebé asume hela kargu, hanesan komandante eskuadra no xefi seksaun-sira, nune’e bele iha koñesimentu bainhira hala’o kna’ar iha terrenu tuir padraun ne’ebé iha ho regra empeñamentu PNTL,” Komandante Sentru Formasaun Polísia, Superintendente Xefi Polísia, Arquimino Ramos, hateten liuhosi komunikadu ne’ebé Agência Tatoli asesu, tersa ne’e.
Ho formasaun ne’e bele aumenta koñesimentu iha área jestaun lideransa no mós lei sira hosi konstituisaun RDTL, lei seguransa interna, lei orgánika PNTL, Regulamentu Disiplinár, lei uza forsa inklui regra ho Norma Organizasaun no Prosedimentu (NOP), ne’ebe utiliza iha PNTL, nune’e ofisiál-sira ne’e mak agora daudaun lidera membru sira loron-loron, entaun presiza koñesimentu ida natón hodi hala’o sira kna’ar.
Alende ne’e iha ofisiais barak mak promove ona iha tinan 2013 to’o agora seidauk iha formasaun kona-bá jestaun lideransa no CFP realiza ona formasaun hanesan iha munisípiu lima no agora ba munisípiu hitu seluk.
Durasaun ba kursu ne’e sei hala’o iha semana rua nia laran, teoria no prátika no formadór hosi CFP rasik hodi tun direta ba kada munisípiu.
Komandante PNTL munisípiu Liquiça, Superintendente Polísia, Umbelina Soares, konsidera formasaun ne’e importante tebes ba komandante eskuadra no xefe seksaun sira, atu bele hala’o knar tuir lei no valór prinsipíu bainhira hala’o knaar hanesan ajente seguransa Estadu.
Jornalista: Nelson de Sousa
Editór: Cipriano Colo
