DILI, 07 setembru 2021 (TATOLI)—Koordenadór Jerál Joven iha Veterinária (JOVET), Abrão Pereira, informa iha sabádu (11/09) ne’e JOVET sei realiza formasaun liuhosi online kona-bá “Oinsa atu aplika ba Bolsu Estudu iha Timor” ba joven sira.
Notísia Relevante: JOVET realiza formasaun prepara joven tau-matan ba saúde animál
“Ita hanoin fó formasaun ne’e tanba ba joven sira iha oportunidade ba bolsu estudu ne’e barak tebes, iha nasaun lubuk ida ne’ebé mak hakarak atu investe joven sira, atu ba hasa’e sira-nia kuñesimentu no matenek liuhosi bolsu estudu sira ne’e. Maibé, dala ruma iha difikuldade hosi parte joven sira nian, oinsá mak atu bele prepara aan didi’ak hodi bele konkore iha bolsa estudu sira ne’e,” Abrão Pereira, hateten ba Agência Tatoli, via telefónika, tersa ne’e.
Tanba ne’e, nia dehan, JOVET iha hanoin atu halo formasaun ne’e ho intensaun atu hanorin joven sira kona-bá abilidade saida de’it mak sira presiza aprende, nune’e iha prosesu atu aplika ba bolsu estudu ruma sira komprende ona.
Matéria ba formasaun online ne’e oinsá atu buka bolsu estudu, iha ne’ebé mak bele aplika bolsu estudu ne’e, dezafiu saida mak enfrenta durante iha prosesu aplikasaun ba bolsu estudu, no abilidade importante saida mak sira presiza aprende hodi aplika ba bolsu estudu ne’e.
Objetivu hosi formasaun online ne’e, atu fó formasaun ba joven sira, oinsá mak atu aprende kona-bá, bainhira atu aplika ba bolsu estudu,iha Timor-Leste.
Inisiativa fó formasaun ne’e tanbá iha pasadu JOVET halo ona formasaun lubuk ida liuhosi online, kona-bá asuntu sira-ne’ebé mak diretamente afeta ba joven sira-nia vida, hamutuk aprende no organiza malu oinsá mak atu atende joven sira seluk.
“Formasaun ne’e prepara joven sira atu konkore iha bolsu estudu sira-ne’e, tanba, iha oportunidade bolsu estudu bara-barak iha Timor hanesan bolsu estudu hosi Austrália, Nova Zelándia, Amérika, no Nasaun Dezenvolvimentu sira seluk ne’ebé mak anuálmente fó bolsu estudu ba timoroan sira. Liuhosi formasaun ne’e, ita-nia hanoin oinsa atu hanorin sira atu bele halo aproveitamentu ne’ebé mak di’ak ba oportunidade bolsu estudu sira-ne’e,” nia hateten.
Totál partisipante ne’ebé sei partisipa iha formasaun online hamutuk 632, ne’ebé kompostu hosi juventude en jerál no estudante Universidade iha Díli laran. Enkuantu, totál membru JOVET hamutuk 150 ne’ebé mesak lisensiadu.
Jornalista : Nelia Fernandes
Editór : Cancio Ximenes