DILI, 07 setembru 2021 (TATOLI) – Ministru Ensinu Superiór Siénsia no Kultura (MESSK), Longuinhos dos Santos, prevee $6,750,748 iha proposta Orsamentu Jerál Estadu 2022, ba programa prioridade tolu, hanesan Boa Governasaun, Jestaun Institusionál no Edukasaun Formasaun.
Proposta orsamentu MESSK nian ne’e aprezenta ona bá Komisaun Revizaun Orsamentu Polítika (KROP) atu tetu molok aprezenta bá Parlamentu Nasionál.
Ba jornalista sira iha Edifísiu Ministériu Finansa, Dili, tersa ne’e, Ministru Longuinhos afirma katak ezekusaun OJE 2021 ne’ebé aloka ba MESSK ezekuta ona 56,6%.
Enkuantu Instituisaun ne’ebé tutela bá MESSK iha mós oportunidade aprezenta sira nia orsamentu rasik atu nune’e bele hetan mós apresiasaun hosi KROP molok haruka ba parlamentu nasionál.
UNTL husu adisionál milaun $2,2
Reitór Universidade Nasionál Timor-Lorosa’e (UNTL) João Soares Martins, realsa katak orsamentu UNTL nian iha primeiru alokasaun tuir pakote fiskál purvolta milaun $1- resin de’it ne’ebé menus hosi OJE 2021 nian.
“Ami haree orsamentu ne’e governu hato’o ne’e la lato’o entaun ami propoin tan adisionál purvolta milaun $2,2 para atu loke tan kursu foun balun maka hanesan kursu psikolojia, istória, Siénsia de ksolok, arte kultura atu konjuga ho turizmu,” nia esklarese.
Nia esplika orsamentu hosi pakote fiskal nian laiha kapitál menór entaun UNTL propoin orsamentu iha kapitál menór nian no iha bens servisu importante tanba atu asegura servisu akadémiku balun.
OJE 2021 ne’ebé mak UNTL ezekuta ona 48,8%. UNTL sei esforsa atu tinan ne’e remata bele ezekuta to’o 80%.
Jornalista : Tomé Amado
Editór : Francisco Simões
