DILI, 08 setembru 2021 (TATOLI)—Diretór Sentru Treinamentu Vokasionál Juventude (STVJ) Camea, Cirilo Luis da Silva, informa sentru ne’e sei hahú fila-fali atividade formasaun iha loron 13 setembru 2021, tanba Governu hakotu ona konfinamentu domisiliáriu iha Munisípiu Dili hosi tuku 23:59 loron 09 setembru 2021.
“Ami sei hahú fila-fali ami-nia atividade formasaun iha segunda-feira (13/09) tanba aban (kinta, 09/09) Governu hakotu ona konfinamentu domisiliáriu iha Dili. Nune’e, iha semana oin ami hahú kedan ami-nia formasaun,” Cirilo Luis da Silva, hateten ba Agência Tatoli, via telefónika, kuarta ne’e.
Bainhira, atu hahú atividade formasaun, sentru ne’e sei fó sai informasaun liuhosi grupu whatsappne’ebé kria ona, nune’e sir abele mai tuir formasaun maibé kumpre nafatin regra prevensaun COVID-19 hosi Ministériu Saúde no OMS.
Nia garante tanba formadór, formandu inklui funsionáriu sira iha STVJ Camea ne’e kontribui ona hodi simu vasina kompleta tanba ida-ne’e hanesan kretéria ida-ne’ebé despaixu hosi SEFOPE haktuir katak bainhira atu reativa formasaun ne’e tenke garante katak formadór no formandu sira ne’e hotu-hotu tenke simu vasina kompleitu.
Totál formandu ba tinan ne’e hamutuk 50 ne’ebé daudaun ne’e tuir formasaun iha área administrasaun no ospitalidade sertifikadu I no II. Enkuantu totál funsionáriu no formadór iha STVJ Camea hamutuk na’in-11.
Jornalista : Nelia Fernandes
Editór : Cancio Ximenes