OJE 2021, CNFP Becora ezekuta ona 54%
DILI, 09 setembru 2021 (TATOLI)—Sentru Nasionál Formasaun Profisionál (CNFP, sigla portugés) Becora, ezekuta ona 54% hosi Orsamentu Jerál Estadu (OJE) 2021 ho totál hamutuk $729,000.00.
Notísia Relevante: OJE 2021, CNFP Becora ezekuta ona 28%
“Hosi fulan janeiru to’o agostu ne’e, Sentru Nasionál Formasaun Profisionál Becora, ezekuta ona Orsamentu Jerál Estadu (OJE) 2021 ne’e, hamutuk 54%,” Diretor Sentru Nasionál Formasaun Profisionál (CNFP) Becora, Lourenço da Silva Gusmão, informa ba Agência Tatoli, iha nia–knaar fatin Becora, kinta ne’e.
Hosi totál $729,000.00 ne’e aloka ba saláriu no vensimentu hamutuk $103,260.00 ne’e eskuta ona 57,12%, bens no servisu hamutuk $625,740.00 ne’e ezekuta ona 56,66%, no kapitál menór $38.000 ne’e ezekuta ona maibé sei iha prosesu nia laran.
“Iha saláriu no vensimentu ne’e, ami selu ba funsionáriu permanente hamutuk na’in–22, inklui diretór no xefe departamentu na’in–tolu no mós funsionáriu kontratadu 40, ne’ebé totál funsionáriu iha CNFP–Becora hamutuk na’in–62 no hosi númeru ne’e inklui Sentru Formasaun Beaço,” nia esplika.
Nia infroma, orsamentu ba ba bens servisu ne’e uza ba viajén lokál, formasaun profesionál, kompra ekipamentu formasaun, halo manutensaun ba edifísiu ne’ebé agora daudaun la’o hela, inklui sosa ekipamentu iha administrasaun. Enkuantu, kapitál menór CNFP–Becora utiliza hodi sosa kaereta ida maibé daudaun ne’e sei iha prosesu nia laran.
Jornalista : Nelia Fernandes
Editór : Cancio Ximenes
