DILI, 13 setembru 2021 (TATOLI) – Prezidente Asosiasaun Futeból Munisípiu Liquiça, Carlito da Costa Alves Correia, informa daudaun ne’e atividade futeból iha Liquiça kontinua la’o normál tanba antes ne’e Liquiça la tama iha serka sanitária no konfinamentu obrigatóriu.
“Atividade futeból iha Liquiça kontinua la’o normál. Buat hotu, ita la’o tuir de’it orientasaun Federasaun Futeból Timor Leste (FFTL” Carlito da Costa Alves Correira ba Agéncia Tatoli iha Dili, segunda ne’e.
Daudauk ne’e arbitrajen iha Munisípiu Liquiça hamutuk na’in-12 ne’ebé hetan ona formasaun ba lisensa D. Enkuantu treinadór hamutuk na’i- ualu (8); hosi númeru ne’e lisensa C na’in-rua (2) no seluk foin D.
Asosiasaun tenta ko’alia hela ho FFTL atu fó nafatin oportunidade ba joven sira iha Liquiça ne’ebé iha interese atu sai treinadór no árbitru.
Subsídiu ne’ebé atribui hosi FFTL ba Asosiasaun
“Subsídiu ne’ebé mak FFTL fó ba ami ho montante $ 1,000.00 ami sente todan loos tanba osan ne’e ami jere ba administrasaun no jogu ruma susar loos tanba la sufisiente,” nia dehan.
Nia haktuir, osan ne’ebé kada fulan haraik hosi FFTL finansia ba sekretariadu, selu árbitru sira bainhira dirije jogu ruma no administrasaun asosiasaun nian.
Jornalista : Hrotencio Sanchez
Editór : Francisco Simões
