BOBONARO, 16 setembru 2021 (TATOLI)—Hahú hosi janeiru to’o setembru, Forum Komunikasi Perempuan (FOKUPERS) Uma mahon Maria-Tapo, munisípiu Bobonaro, rejista kazu violénsia doméstika no violénsia bazeia ba jéneru hamutuk 24.
Kazu hirak-ne’e maioria mai hosi munisípiu Bobonaro, no iha mós munisípiu Baucau no munisípiu sira seluk.
Notísia relevante:KRAM kontinua fó advokasia ba GAM iha Bobonaro
“Sira-ne’e kategoria ema idade adultu mak barak liu no menór ne’e menus,” Koordenadora, FOKUPERS Uma mahon Maria-Tapo, Dália da Costa Gomes, informa ba jornalista iha kna’ar fatin, suku Ritabou, kinta ne’e.
Hosi númeru ne’e, ema adultu iha kazu ualu, menór idade iha rua, abandona hosi la’en ou namorado iha lima, violénsia seksuál ida, violénsia púlika ba ema adultu iha rua no menór ida.
Kauza loloos hosi kazu ne’e mak hanesan parte violasaun domestika nian, hare liu ba aspetu ekonomia, tanba rendimentu família menus atu asesu ba merkadu, dezempregu no kulturál.
Parte abandona, tanba ransu livre, sosiál média no labele kontrola emosaun, hosi parte violénsia públika tanba fatór ekonomia, kulturál no dezempregu.
Hosi vítima 24 ne’ebé FUKUPERS halo atendimentu iha 21 mak halo ona re-integrasaun ba sira-nia família no sira seluk sei kontinua halo hela atendimentu tanba ho idade menór.
Durante fó asisténsia ba vitima sira, FOKUPERS halo koordenasaun ho Ministériu Solidariedade Sosiál no Inklusaun (MSSI), Ministériu Edukasaun Joventude no Desportui (MEJD), Igreja Katólika, PRADET no Polísia Nasionál Timor-Leste (PNTL) Serbisu Imigrasaun, atu asegura vítima-sira iha perigu nia laran no kontrola saúde.
FOKUPERS mós sei esforsu koordena ho autoridade lokál-sira, atu halo sosializasaun oinsá eduka sosiedade hodi muda sira-nia mentalidade, nune’e bele minimaza kazu violénsia doméstika no violénsia bazeia ba jéneru iha Timor-Leste liu-liu iha munisípiu Bobonaro.
Atividade ne’ebé atu implementa mak hanesan Counseling group bolu fali vitima sira ne’e hodi halo prosesu re-integrasaun ba familia, akompaña ba parte legál vítima sira nian ne’ebé hetan notifikasaun hosi Tribunál.
Durante ne’e Uma mahon Maria-Tapo hetan apoiu hosi MSSI ho montante rihun $43-resin hodi finansia ba atividade hanesan Counseling group ho vítima no sira ne’ebe mak re-intrega ona ba família.
Jornalista: Sérgio da Cruz
Editór: Cipriano Colo
