DILI, 17 setembru 2021 (TATOLI)—Psychosocial Recovery and Development in East Timor (PRADET), tuir planu iha segunda (20/09) ne’e sei fó formasaun kona–bá ‘Promove Saúde Mentál iha Situasaun Pandemia COVID–19’ ba konsellu suku sira iha suku Comoro.
Koordenadór Programa Asisténsia ba Moras Mentál, Psychosocial Recovery and Development in East Timor (PRADET), Nicolau Vicente Ximenes, hateten iha loron segunda (20/09) PRADET sei fó formasaun ba konsellu suku iha suku Comoro kompostu hosi xefe suku, xefe aldeia no membru Konsellu Polísiamentuu Komunitáriu (KPK) ne’ebé PRADET konsidera hanesan liña frente ne’ebé mak halo atendimentu ba komunidade loro–loron, mezmu iha situasaun pandemia COVID–19.
“Importânsia hosi formasaun ne’e, atu promove sira–nia saúde mentál, no mós prevensaun COVID–19 ninian, atu hasa’e sira–nia konsiénsia kona–bá maneira prevensaun ba sira–nia aan, atu koidadu sira–nia saúde mentál no mós prevene COVID–19,” Nicolau Vicente Ximenes hateten ba Agência Tatoli, via telefónika, sesta ne’e.
Tanba, nia dehan, iha situasaun pandemia COVID–19 ne’e afeta mós ba ema–nia psikolojia, liu-liu hanesan ema barak sente tauk, sente atrapalha, preokupa, stress, no balun mós trauma tanba hanoin barak.
“Informasaun sira-ne’ebé hosi PRADET fornese hanesan koñesimentu kona–bá stress, trauma, no impaktu hosi COVID–19 ne’e afeta ba ema–nia psikolojia. Maneira simples sira mak oinsá sira bele halo ezersísiu, atu maneza sira–nia emosaun, nune’e kuidadu sira–nia saúde mentál, hodi hala’o sira–nia kna’ar loro–loron nian,” nia dehan.
Matéria ne’ebé PRADET sei fó ba konsellu suku Comoro mak koñesimentu kona–bá saúde mentál, stress, moras mentál, maneja emosaun, tentativa oho aan, prevensaun ba COVID–19, inklui vasinasaun.
Entretantu, formasaun ne’e hala’o durante loron rua hahú hosi 20 to’o 21 setembru, ho totál partisipante na’in–25 ne’ebé kompostu hosi xefe suku, xefe aldeia, delegadu, delegada, no membru Konsellu Polísiamentu komunitária (KPK).
Jornalista : Nelia Fernandes
Editór : Cancio Ximenes
