DILI, 20 setembru 2021 (TATOLI)–Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, hateten, parte autoridade delega ona tékniku na’in-ida atu halo akompañamentu ba konstrusaun ró Berlin-Ramelau, molok mai iha Timor-Leste iha outubru.
“Ami haruka ona tékniku ida bá iha nasaun Xina iha semana kotuk atu bá halo akompañamentu ba ró Berlin-Ramelau, molok aranka hosi Xina mai Timor-Leste,” Prezidente APORTIL informa ba Agência TATOLI via telefónika, segunda ne’e.
Notísia relevante: Posibilidade ró Berlin-Ramelau to’o Timor-Leste iha outubru
Tuir nia, tékniku ne’ebé desloka ona ba Xina, durante ne’e akompaña no envolve iha prosesu diskusaun sira to’o kontrusaun ró Berlin-Ramelau ramata.
Progresu konstrusaun ró Berlin-Ramelau la’o daudaun, ne’ebé iha ona faze finál no téknikamente kompleta ona, tanba ne’e foin lalais halo ona teste tama ba tasi laran.
“Ró ne’e hatun ona ba tasi laran no halo ona teste dahuluk ne’ebé buat hotu la’o di’ak 100%, hein ró atu sai husi Xina mai Dili,” nia akresenta.
Ró atu mai Timor-Leste presiza kompleta tan prosesu balun, liuliu hetan SeaWorthy certificate hosi Norwegia no kompañia presiza halo termu entrega hodi ró bele mai ona iha outubru tinan ne’e.
Iha loron 31 maiu 2019, Governu Timor-Leste reprezenta hosi Ministru Transporte no Komunikasaun, José Agostinho da Silva, asina akordu ho Governu Federál Alemaña ho Kompañia Estaleiru Navál ‘Damen’ hodi halo konstrusaun ró Berlin-Ramelau.
Projetu ne’e Governu Alemaña kontribui milaun £7,8 no Timor-Leste millaun £7,1.
Tuir planu ró ne’e sei halo operasaun dahuluk iha tinan 2021 ho destinasaun hosi Dili bá Manatuto, Baucau, Lautém no Viqueque.
Jornalista : Natalino Costa
Editora : Julia Chatarina
