DILI, 20 setembru 2021 (TATOLI)—Diretór Jerál Sentru Formasaun Fundasaun Aquito Tanque da Guerra (FATG), Herculano dos Reis Pinto, hateten sentru ne’e oferese formasaun programa adisionál gratuita ba joven sira.
“Iha Fundasaun Aquito Tanque da Guerra nia área formasaun hanesan portugés, inglés, jornalizmu, administrasaun, no informátika. No ba sira ne’ebé tuir formasaun sira ne’e, ami fó tan gratuita kona-bá programa adisionál hanesan programa Leadership no públik speaking,” Herculano dos Reis Pinto, hateten ba Agência Tatoli, iha Aimutin, Díli, segunda ne’e.
Sentru Formasaun Fundasaun Aquito Tanque da Guerra fó formasaun iha programa adisionál gratuita tanba haree ba situasaun reál agora dadaun, estudante no joven barak mak husu ba nasaun atu fó buat ruma ba sira, maibé sira nunka hanoin katak saida mak atu halo ba nasaun ne’e.
“Liuhosi programa ida ne’e, ita bele dedika sira, atu nune’e sira bele kontribui ba prosesu dezenvolvimentu ida-ne’ebé ho di’ak,” nia dehan.
Ho nune’e, programa adision’al liuliu ba programa leadership, sentru ne’e hanorin ema atu sai lideransa ne’ebé di’ak.
“Maneira ne’ebé ami hanorin ba ami-nia estudantes sira mak lideransa demokrátiku no autokrátiku. Alende programa leadership iha mós programa públik speaking hodi prepara mentalidade, fisik, no matéria atu ko’alia. Aleinde ne’e, ami mós hanorin kona-bá Master of Ceremony (MC) hodi eprende kona-bá teknik vocál, atu nune’e sira labele sente tauk, bainhira sira sai aprezentadór ou sai oradór ruma,” nia esplika.
Prezidente Sentru Formasaun Fundasaun Aquito Tanque da Guerra, Lourenço Jose Cabrál, informa sentru ne’e harii iha tinan 2021, ne’ebé funda ho objetivu atu fó formasaun no kapasitasaun ba estudante no juventude sira, hodi prepara fini ba prosesu Dezenvolvimentu Nasionál, inklui atu garantia estudante no juventude eduka komunidade sai moris saudavél.
Totál formadór hamutuk na’in-ualu (8) ne’ebé sei f’o formasaaun iha Administrasaun, lingua Inglés, Portugués, Jornalismu, Informátika.
Jornalista : Nelia Fernandes
Editór : Cancio Ximenes
