DILI, 20 setembru 2021 (TATOLI)—Ekipa tékniku hosi Ministériu Asuntu Parlamentár no Komunikasaun Sosiál (MAPKOMS) daudaun ne’e prepara baze legál hodi atribui suplementu remuneratóriu ba jornalista hirak ne’ebé ninia servisu tama kategoria liña frente iha ámbitu prevensaun no mitigasaun COVID-19 iha Timor-Leste.
“Kona-ba subsídiu liña frente ba jornalista-sira, daudaun ne’e asesor MAPKOMS haree hela Dekretu-Lei tanba foin lalais Prezidente Repúblika promulga ne’e apropriadu ba de’it funsionáriu públiku no pesoál sira ne’ebé servisu ba prevensaun surtu ne’e, entaun jornalista presiza dekretu-lei própriu rasik hodi fó dalan hodi hetan subsídiu,” Ministru Asuntu Parlamentár no Komunikasaun Sosiál, Francisco Martins da Costa Perreira Jerónimo, hateten, hafoin relata servisu ministériu ba Primeiru-Ministru, Taur Matan Ruak, iha Rezidénsia Ofisiál, Farol, segunda ne’e.
Notísia relevante: MF simu lista liña frente instituisaun rua ba suplementu remuneratóriu
Daudaun ne’e ekipa sira halo hela preparasaun másima no haree didi’ak dalan hodi buka solusaun.
“Sira haree didi’ak hela hodi hetan solusaun tanba ita lakohi halo tiha lei hotu no aprova, hafoin lori ba Prezidente Repúblika veta fali mós ladún di’ak, entaun tenke prepara no halo koordenasaun di’ak atu finaliza no hetan aprovasaun iha Konsellu Ministru no promulga hosi Prezidente Repúblika,” nia esplika.
Tuir Ministru, kona-ba kategoriza jornalista liña frente, kada mídia mak define ninia jornalista ne’ebé konsidera liña frente.
“Tanba ne’e, ami husu lista hosi mídia sira no ministériu, no bazeia ba lista ne’e maka mak ami simu hodi la’o tuir ida-ne’e. Daudaun ne’e ami simu hotu ona lista jornalista liña frente hosi mídia sira,” nia akresenta.
Durante inísiu implementasaun Estadu Emerjénsia, Governu mobiliza rekursu disponível hotu atu servisu hanesan liña frente atu metiga no prevene propagasaun vírus COVID-19 hanesan profisionál saúde, entidade seguransa no defeza, protesaun sivíl no seluk tan.
Liña frente hamutuk 13.845 hetan pagamentu ho totál millaun $9,7 ba fulan tolu, ne’ebé hosi totál ne’e, lista hosi MAPKOMS hamutuk 216, ho totál pagamentu $97.425.
Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) ne’ebé envolve iha prevensaun no kontrolu COVID-19.
Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia, Diresaun Nasionál Seguransa Patrimóniu Públiko, no servisu autoridade ka administrasaun munisipál, responsável ba halibur, lori no soe lixu, sira-ne’ebé hola parte servisu autoridade ka administrasaun munisipál, servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha Rejiaun Adminstrativa Espesial Oé-cusse Ambeno (RAEOA).
Jornalista : Antónia Gusmão
Editora : Julia Chatarina
