DILI, 22 setembru 2021 (TATOLI)—Diresaun Nasionál Prevensaun Konflitu Komunitária (DNPKK), hosi Sekretária Estadu Protesaun Sivíl (SEPS), fó kapasitasaun kona-bá prevensaun no rezolusaun konflitu sensível ba jéneru ba treinadór hamutuk na’in 12 hosi munisípiu Bobonaro, Liquiça, Manufahi, Aileu, Lauten, Baucau ho Dili.
“Formasaun ba partisipante-sira atu sai fasilitadór ba mediadór-sira iha liña ministériu no sosiedade sivíl ne’ebé hola parte iha harii pás no prevensaun konflitu iha komunidade,” Fasilitadór DNPKK, Julião Fernandes, hateten ba jornalista-sira iha salaun Delta Nova, kuarta ne’e.
Notísia relevante:DNPKK-UN Women sei kapasita mediadór-sira
Mediasaun liga liu ba sensível jéneru, oinsá envolve partisipasaun ema hotu, inklui ema vunerável hanesan defisiénsia, idozu, feto ho labarik.
Formasaun ne’e hala’o durante loron tolu hahú hosi 22 to’o 24 setembru ho matéria prevensaun konflitu, rezolusaun konflitu, maneira halo mediasaun ne’ebé sensível ba jéneru no inkluzivu.
Durante ne’e, DNPKK halo ona formasaun liuhosi sensibilizasaun no edukasaun sívika iha nível komunidade, hodi muda ema nia hanoin no atitude atu kontribui ba prevensaun konflitu.
Tuir dadus, hahú hosi janeiru to’o agostu tinan ne’e, DNPKK rejista kazu foun hamutuk 295 hosi territóriu no kazu ne’ebé prosesu hela hosi 2020 to’o 2021 iha 134 ho arkivu ka rezolvidu liu hosi prosesu mediasaun hamutuk 196, ne’ebé ho autór no vítima iha mane 452 feto 132.
Kazu hirak-ne’e ho nia katergoria haat mak hanesan, konflitu negósiu, interpesoál liga ba asalta-malu entre joven, konflitu kona-bá rai no konflitu kestaun família.
Kazu sira-ne’e, mediadór-sira simu hosi komunidade hodi fasilita de’it mediasaun to’o parte sira simu malu, hodi komprometidu sei la kria tan konflitu no prontu kontribui ba estabilidade iha sosiedade.
Formasaun ne’e realiza tanba DNPKK serbisu hamutuk ho parseiru UN-Women.
Jornalista: Nelson de Sousa
Editór: Cipriano Colo
