DILI, 27 setembru 2021 (TATOLI)— Xefe Estadu Maiór FALINTIL-Forsa Defeza Timor-Leste (F-FDTL), Tenente Jenerál, Lere Anan Timur, konsidera Saudozu José António Gomes da Costa Ma’Huno Bulerek Karathayano, nu’udár erói no líder bo’ot rezisténsia-nian, ne’ebé iha nasionalizmu no patriotizmu, hadomi rai ida-ne’e, to’o dedika no sakrifíka an iha luta libertasaun.
“Ami na’in-rua Saudozu Mau’Huno kolega di’ak, nia nu’udár membru Comite Central FRETILIN primeira jerasaun ho maun boot Xanana Gusmão. Ema ida ne’ebé iha nasionalizmu no patriotizmu nakonu, hadomi rai no povu TL,” Tenente Jenerál, Lere Anan Timur, hateten ba jornalista iha Kuartél Jenerál Fatuhada, segunda ne’e.
Notísia relevante:Parlamentu Nasionál aprova votu pezár ba saudozu Ma’Huno
Lere Anan Timur mós triste tanba TL lakon líder no erói di’ak ida, maibé ida-ne’e planu Maromak-Nian tanba ne’e, família no Timoroan prontu simu realidade ne’e maski ho laran triste.
“Importante maka dignifika no fó onra nafatin ba nia figura, tanba mate ne’e dala ida de’it ho istória mak la hanesan. Tanba Saudozu Ma’Huno nia istória la hanesan ho ida seluk,” nia subliña.
Durante iha luta libertasaun, Lere Anan Timur akompaña Ma’Huno tinan barak iha aí-laran, sempre la’o hamutuk, la hakiduk ba inimigu, hakat ho prinsípiu revolusionáriu mate ka moris ukun rasik an.
“Dala ida maun Xanana, Ma’Huno ho kuadru-sira seluk hala’o hela reuniaun iha Konsellu no to’o klaran, maun Xanana hirus ona atu tuku Saudozu Ma’Huno. Maibé, Laleia oan sira dehan ba malu, nune’e Laleia na’in-hira oan de’it atu ba ne’ebé. Ida ne’e hatudu katak, tenke hamutuk,” nia haktuir.
Mensajen hosi istória ne’e, Lere Anan Timur, dehan líder sira tenke unidade no tenke hamutuk duni, hodi dezenvolve nasaun no povu ida-ne’e.
Jornalista: Nelson de Sousa
Editór: Cipriano Colo
