DILI, 27 setembru 2021 (TATOLI)–Dekretu Prezidente Repúblika ne’ebé dekreta iha loron segunda ne’e deside haloot saudozu António João Gomes da Costa ‘Ma’Huno Bulerek Karathaiano’ iha semitériu espesiál.
Prezidente Repúblika, Francisco Guterres Lú Olo, liuhosi Dekretu Prezidente Repúblika, númeru 80/2021, 27 setembru, dekreta Estadu fó onra fúnebre no hakoi António João Gomes da Costa ‘Ma’Huno Bulerek Karataiano’ iha semitériu espesiál, iha Jardim dos Herois da Pátria iha Metinaro.
Komunikadu imprensa ne’ebé Agência TATOLI, asesu define nune’e, dekretu Prezidente Repúblika ne’ebé publika ohin, iha Jornál Repúblika, hateten Konstituisaun konsagra rekoñesimentu no valorizasaun ba rezisténsia sekulár Povu Maubere kontra dominasaun estranjeira no kontributu ema hotu-hotu ne’ebé luta ba independénsia nasionál.
Lei kona-ba Estatutu Kombatente Libertasaun Nasionál reafirma vontade atu fó omenajen ba esforsu sira-ne’ebé manifesta hosi kombatente libertasaun nasionál iha luta ba independénsia nasionál.
Haree ba kontribuisaun ba luta libertasaun Pátria, Konsellu Kombatente Libertasaun Nasionál (CCLN, sigla portugés) autoriza António João Gomes da Costa ‘Ma’Huno Bulerek Karathaiano’ iha direitu atu hetan onra fúnebre no hakoi iha semitériu espesiál iha “Jardim dos Herois da Pátria” Metinaro, nu’udar kombatente libertasaun nasionál.
Ma’Huno Bulerek Karathaiano, nia kontribuisaun iha luta libertasaun Patria, nu’udar Fundadór ASDT, membru Komite Sentral FRETILIN (CCF, sigla portugés), Xefe Konsellu Polítiku Militár Frente Armada, Sekretáriu Komisaun Diretiva Fretilin, Komandante FALINTIL, Sekretáriu Rejiaun III, líder ida-ne’ebé inspira no besik tebes ba foinsa’e klandestinu sira iha vila laran, iha Timor-Leste no iha Indonézia.
José António Gomes da Costa Ma’Huno Bulerek Karathaiano moris iha 14 Abril 1949 no iha 24 setembru 2021 hakotu ís iha Hospital Nasionál Guido Valadares (HNGV) tanba enfrenta moras stroke.
Notísia Relevante: Riak Leman: “Ma’Huno nia ajitasaun, ita sente ukun-an besik hela”
Jornalista : Evaristo Soares Martins
Editór : Cancio Ximenes
