MEJD planeia konstrui sala aula ualu eskola ESJ 5 Maiu

DILI, 28 setembru 2021 (TATOLI)–Ministériu Edukasaun, Juventude no Desportu (MEJD) liuhosi  projetu komunitáriu sei konstrui sala aula ualu iha Eskola Sekundáriu Jerál (ESJ) 5 Maiu, Becora tanba tama lista kategória risku ba inundasaun.

“Ita-nia eskola mós tama iha projetu komunitáriu tanba eskola ne’e sempre hasoru inundasaun kada tinan. Nune’e ita hetan kontrusaun sala aula ualu,” Diretór Eskola ESJ, Manuel Verdial, hateten, ba Agência TATOLI, iha knaar fatin Becora, tersa ne’e.

Konstrusaun ne’e kompostu sala aula ne’ebé utiliza ba ensinu aprendijazen, sala ida ba profesór sira no toilet feto no mane.

MEJD ne’ebé sai na’in ba projetu no sei loke konkursu públiku, hafoin asina kontratu ho empereza vensedór atu ezekuta obra ne’e.

Entretantu, Diretór Nasionál Infraestrutura Edukativa,  Hélio Lopes, informa,  tinan ne’e sei inisia obra balun tanba iha ona orsamentu hosi transfarénsia públika ne’ebé aloka ona mai Diresaun Infraestrutura purvolta millaun $20, kapitál dezenvolvimentu millaun $2,8 no kapitál menor millaun $2.

“Iha kapitál dezenvolvimentu, ita iha totál projetu 22 ne’ebé prosesa aprovizionamentu la’o ona, transfarénsia públika nian, ita-nia grupu komunitáriu atu prepara ona atu implementasaun projetu,” nia akresenta.

Maski nune’e, MEJD  hein loke konta bankária iha tempu besik hodi aselera liután prosesu hodi implementa projetu iha outubru ne’e.

Jornalista : Tomé Amado

Editór       :  Julia Chatarina