DILI, 29 setembru 2021 (TATOLI)—Sentru Formasaun Fundasaun Hadomi Timor (SFFHT) sei realiza formasaun kona-bá “Dezeñu Gráfiku ho Aplikasi Inkscape” ba partisipante 25, kompostu hosi universitáriu, funsionáriu no juventude en jerál.
Notísia Relevante: Telemor sei kria Sistema E-Learning ba Fundasaun Hadomi Timor
“Formasaun ne’e hakarak kapasita no hasa’e foinsa’e sira-nia koñesimentu, atu sira bele asesu ba iha merkadu servisu liu-liu ba dezeñu nian. Formasaun ne’e sei realiza iha domingu (03/09) ne’e,” Diretór Ezekutivu Sentru Formasaun Fundasaun Hadomi Timor, Abrão Monteiro, hateten ba Agência Tatoli, iha nia knaar–fatin, Faról, Dili, kuarta ne’e.
SFFHT realiza formasaun ne’e, tanba haree ba merkadu servisu iha Informátika (IT) nian barak liu-liu liga ba dezeñu gráfiku nian.
Kuaze Instituisaun presiza ema-ne’ebé mak iha koñesimentu kona–bá dezeñu gráfiku, atu bele dezeña brosura, sertifikadu, roupa, box no Id card, maibé ida ne’e presiza ema ne’ebé mak iha koñesimentu kona–bá dezeñu gráfiku, tantu nia atu bele utiliza software open sourse no software ne’ebé komersiál.
“Oportunidade di’ak ba ami atu bele fó koñesimentu no kapasita joven sira, tanba ami hatene ninia merkadu ba dezeñu gráfiku ne’e barak maibé la’ós Instituisaun Governu nian de’it. Ezemplu, kompañia sira-ne’ebé mak loke rentál, sablon roupa, cetak id card, ida ne’e presiza tebes ema sira-ne’ebé mak hatene dezeñu. Ho ida-ne’e, ami hakarak fasilita formasaun ne’e ba joven sira atu bele iha koñesimentu kle’an ba dezeñu gráfiku, hodi sira bele asesu ba iha merkadu servisu,” nia hateten.
Matéria formasaun ne’e SFFHT sei utiliza software inskcape, tanba normálmente hotu-hotu iha nia guide line (matadalan) no ka ninia matadalan.
“Jerálmente, matéria sira-ne’ebé ami atu rezumu iha formasaun ne’e mak oinsá sira atu komprende tools hosi aplikasaun inskcape, no ami sei iha mós estudu kazu 10 resin, inklui sira tenke hatene atu halo logo. Ida-ne’e presiza nesesidade saida kuandu ita atu halo logo, dezeñu roupa, Id Card, no sertifikadu, ida ne’e mak estudu kazu ne’ebé ami sei halo. Maibé, ninia matéria jerálmente ne’ebé sei aprende mak, nia tenke aprende ka domina tools hosi inskcape ne’e rasik,” nia esplika.
Bainhira komprende tools hosi inskcape ne’e rasik, mak partisipante sira sei komprende oinsá atu halo objetu ida.
“Intensaun ita utiliza software no inskcape ne’e, ita atu halo objetu. Hanesan ita bele halo helem, komputadór, uma, ai–horis, boneka, serfikadu, sira-ne’e mak objetu,” nia dehan.
Entretantu, formasaun kona–bá “Dezeñu Gráfiku ho Aplikasi Inkscape” ne’e ho durasaun loron ida, ho osan rejistrasaun $5.00, no hosi osan ne’e sei utiliza ba modulu no sertifikadu.
Jornalista : Nelia Fernandes
Editór : Cancio Ximenes
hau hakarak tuir workshop konba desenho grafiku nee
Orgulhu tebes tanba imi konvida ona ami joven sira ne’ebe iha ami nia kapasidade, Talentu bele ba participa iha seminário ida ne’e