DILI, 30 setembru 2021 (TATOLI)–Komisaun C ne’ebé trata asuntu Finansa Públika submete ona relatóriu no paresér ba Prezidente Parlamentu Nasionál, Deputadu Aniceto Longuinhos Guterres Lopes.
Notísia Relevante: Orsamentu privativu PN aprovadu iha finál globál
“Ami konklui ona ami-nia relatóriu no paresér, no agora kedas ami submete ba Prezidente parlamentu nasionál atu halo ajendamentu ba debate orsamentu privativu tinan 2022 nian,” Prezidente Komisaun C, Deputada Maria Angélica Rangel, informa ba jornalista sira, iha uma fukun, kinta ne’e.
Governu fó envelope fiskál ba Parlamentu Nasionál ho montante millaun $14,9, maibé uma fukun halo ezersísiu boot hodi redús ba millaun $14,7.
“Programa prioridade ne’ebé mak atu haree oinsá atu halo lansamentu ba tinan 20 ba Konstituisaun RDTL. Ida-ne’e mak sai prioridade maibé ita haree took ba debate plenária liu ka laliu,” nia dehan.
Entretantu tuir portál transparénsia Ministériu Finansa nian fó-sai katak, orsamentu privativu iha 2021 ho montante $ $14,484,066.00. Hosi montante orsamentu ne’e gasta ona $8,623,689.41, saldu $4,695,718.43, kompromisu sira $124,747.50, obrigasaun $1,039,910.66 no ezekusaun atinje 66.7%.
Jornalista : Evaristo Soares Martins
Editór : Cancio Ximenes
