LEP-TL fó formasaun lian inglés ba vendedór ambulante
DILI, 30 setembru 2021 (TATOLI)—Sentru Formasaun Learning Education Program of Timor–Leste (LEP-TL) durante ne’e voluntáriamente fó formasaun lian inglés ba vendedór ambulante, nune’e ambulante sira bele promove sira–nia produtu ba ema estranjeiru sira.
Prezidente Learning Education Program of Timor–Leste (LEP-TL), Maria da Rosaria Cancio, hateten programa ne’e estabelese iha tinan 2020, tanba vendedór sira presiza tebes atu hasa’e sira–nia koñesimentu iha lian inglés atu promove sira–nia produtu maibé ho koñesimentu ne’ebé menus, entaun defisil ba sira atu promove sira–nia produtu ba ema estranjeiru sira.
“Ami haree ba situasaun ida-ne’e, ami buka planu oinsá atu ajuda maluk vendedór sira, entaun ami kria programa ida ho naran Street Engles Programa of Timor–Leste. Iha programa ne’e ami haree ba iha maluk vendedór sira, oinsa mak atu hanorin sira hodi promove sira–nia produtu liuhosi lian inglés,” Maria da Rosaria Cancio hateten ba Agência Tatoli, iha nia knaar–fatin, Raikotu, Dili, kinta ne’e.
Iha programa ne’e la’ós haree de’it ba inglés maibé iha mós costumer service hanesan oinsá atu fasilita vendedór sira hodi promove sira–nia produtu, liuhosi maneira customer service ba sira–nia customer.
“Iha programa Street English ne’e ami la’ós haree de’it ba vendedor sira maibé ami mós haree ba labarik ki’ik-oan sira iha Largo Lecidere. Entaun, iha programa ne’e ami hala’o durante fulan tolu no atividade ne’e ami hala’o iha loron sábadu no domingu. Iha atividade ne’e ami foti de’it minutu 30 ka oras ida de’it, tanba haree mós ba iha sira–nia atividade negósiu,” nia dehan.
Ba tinan ida-ne’e, nia dehan, sira seida’uk kontinua programa ne’e tanba foin daudaun konfinamentu obrigátoriu foin ramata, maibé sira iha ona planu katak iha semana oin ne’e sei hahú fila–fali programa ne’e.
Iha programa ne’e la’os timor-oan mak asesu de’it, maibé iha mós ema Indonézia balun ne’ebé hala’o sira–nia atividade negósiu hanesan faan bakso, tanba programa ne’e hanesan movimentu, entaun estudante ne’ebé mai ne’e sei la permanente.
Maneira hanorin ne’e mós la masimiza teoria, maibé sira halo prátika hanesan oinsá atu halo komunikasaun ho ema estranjeiru sira ho lian Inglés, atu nune’e sira bele promove sira–nia produtu.
Tuir dadus hosi LFP–TL katak, sentru ne’e fó ona formasaun iha programa Street English Programa of Timor–Leste ba ema hamutuk 27, kompostu hosi vendedór iha Largo, Palásiu Governu nia oin, inklui estudante ne’ebé la’o iha dalan ninin.
Sentru Formasaun Learning Education Program of Timor–Leste (LEP TL), harii iha tinan 2019 ne’ebé funda hosi ema na’in-rua, ho objetivu atu fasilita joven sira hodi hasa’e sira–nia koñesimentu, nune’e sira bele kompete iha nivel nasionál no internasionál
Área formasaun ne’ebé eziste iha sentru formasaun hanesan, junior education programa of Timor–Leste hosi programa ne’e ba labarik sira ne’ebé aprende kona–bá inglés, portugés, no matemátika.
Iha mós área inglés ba juventude en jerál no dadaun ne’e iha área formasaun rua mak estabelese tan hanesan lian español, korea, no daudaun ne’e iha hela faze rejistrasaun.
“Iha sentru ne’e, ami mós oferese oportunidade gratuita ba hirak ne’ebé mak mai tuir formasaun iha ami–nia sentru. Oportunidade gratuita, hanesan iha make–up class, ida ne’e hanesan adisionál ba sira-ne’ebé mak mai tuir kursu ne’e relasiona ho área ne’ebé sira foti,” nia dehan.
Iha mós professionál development skill, ida ne’e haree kona–bá oinsa atu prepara joven ka estudante sira ne’ebé mak tuir formasaun iha sentru ne’e, atu sira aprende oinsá atu aplika ba kampu traballu.
Nune’e mós, iha mós aplication process ne’ebé sira fo-hanorin kona-bá oinsá prepara sira–nia aan atu aplika ba bolsu estudu no programa ne’e sei fahe hosi ema-ne’ebé mak espesifiku iha área ida ne’e.
Entretantu, totál funsionáriu no formadór iha Sentru Formasaun Learning Education Program of Timor–Leste (LEP-TL), hamutuk na’in–16, ne’ebé kompostu hosi ema estranjeiru no timor-oan.
Jornalista : Nelia Fernandes
Editór : Cancio Ximenes
