DILI, 01 outubru 2021 (TATOLI)—Asosiasaun Halibur Defisiénsia Matan Timor-Leste (AHDMTL), sesta (01/10) ne’e hala’o sensibilizasaun kona–bá termonolojia no konvensaun direitu ba Ema ho Defisiénsia (EhD) ba komunidade iha suku Bereleu, Postu Administrativu Lequidoe, Munisípiu Aileu.
Notísia Relevante: Semana oin, AHDMTL sei halo sensibilizasaun ba komunidade iha Faturilau
“Sensibilizasaun ne’e, ita atu hasa’e komunidade, famíli no ema ho defisiénsia sira-nia konxiénsia, atu bele hatene sira–nia direitu, nune’e ema bele uza terminolojia ne’ebé dignu hasoru ema ho defisiénsia sira no introduz ezistensia AHDMTL ba komunidade,” Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, hateten ba Agência Tatoli, via telefónika, sesta ne’e.
Tuir nia, AHDMTL hala’o sensibilizasaun ne’e tanba iha área rurál ema la hatene ema ho defisiénsia nia direitu, entaun AHDMTL hakarak nafatin hala’o sensibilizasaun ne’e ba iha komunidade, familia no autoridade lokál sira atu bele valoriza no konsidera direitu ema ho defiénsia sira.
Sensibilizasaun ba komunidade iha suku Bereleu, Postu Administrativu Lequidoe, Munisípiu Aileu ne’e la’o durante loron ida ba partisipante na’in-25 ne’ebé kompostu hosi komunidade, familia eme ho defisiénsia, juventude no autoridade lokál sira.
Tuir planu, AHDMTL sei kontinua hala’o sensibiizasaun ne’e ba komunidade iha munisípiu Aileu, Postu Administrativu Remixiu, suku Liurai, Fatrasa, no suku Hato.
Jornalista : Nelia Fernandes
Editór : Cancio Ximenes
