Governu sensibiliza adezaun Timor-Leste ba Organizasaun Mundiál Komersiu
DILI, 01 outubru 2021 (TATOLI)—Governu liuhosi Ministériu Koordenadór Asuntu Ekonómia (MKAE) no ekipa traballu Organizasaun Mundiál Komersiu (OMK) Timor–Leste, sesta ne’e (01/10) hala’o sensibilizasaun kona–bá prosesu adezaun Timor–Leste ba Organizasaun Mundiál Komérsiu (OMK) ba jornalista sira hosi mídia nasionál sira.
“Sensibilizasaun ne’e parte ida importante hosi Governu, atu ko’alia kona-bá adezaun Timor-Leste ba Organizasaun Munidál Komérsiu (OMK),” Koordenadór Sekretariadu Téknika Adezaun Timor–Leste ba Organizasaun Mundiál Komersiu (OMK), Cesar Quintas, hateten ba jornalista sira iha salaun Conselho de Imprensa (CI), Dili, sesta ne’e.
Prosesu inísiu adezaun Timor–Leste hetan ona benefísiu barak, entermus sai observadór no iha direitu atu asesu ba asisténsia hosi parseiru dezenvolvimentu sira.
Agora daudaun Timor-Leste hetan benefisiu ida-ne’e, entermus fó formasaun ba rekursu umanu no mós apoiu ba halo reformasaun instituisaun sira, tanba Timot-Leste bele halo komérsiu iha mundu liu-liu ba iha nasaun 174 no bele asesu sira–nia merkadu ho dignu.
Bainhira Timor–Leste reforma ona sistema komérsiu mak Timor–Leste iha oportunidade bele lori investór internasionál sira iha konfiansa atu investe iha Timor–Leste, nune’e iha disputa ruma kona–bá komérsiu nian, Timor–Leste bele lori ba iha OMK atu diskute.
“Ita la haree nasaun boot ho ki’ik, maibé haree ba direitu komérsiu nian. Tanba disputa bele liuhosi dalan seluk, maibé importante liu mak ba liuhosi OMK atu halo konsensu no mós bele rezolve problema,” nia dehan.
Prezidente Conselho de Imprensa (CI-sigla portugés), Virgílio da Silva Guterres, hateten programa sensibilizasaun ida-ne’e importante ba jornalista no profisionál sira-ne’ebé durante servisu loro-loron hodi fahe informasaun ba públiku.
“Agora, instituisaun sira-ne’e mak mai rasik hodi lori informasaun atu fahe ba ita. Agora depende ba ita jornalista no ba mídia sira atu buka esforsu aan, informasaun no faktu sira-ne’ebé nesesáriu atu ita fó hatene ba ita–nia públiku,” nia dehan.
Liuhosi atividade ne’e, importante ba jornalista sira atu hetene no aproveita atu husu ba ekipa tékniku hosi OMK atu sira esplika vantajen saida mak Timor–Leste sei hetan hosi adezaun ne’e no iha komérsiu ne’e saida mak Timor–Leste sei faan ba ema.
Reprezentante Ekipa Sekretáriadu Téknika Organizasaun Mundiál Komersiu (OMK), Maria Martins da Silva, hateten papel mídia iha adezaun Timor–Leste ba OMK hanesan parseiru Governu nian hodi halo advokasia liuhosi informasaun no faktu kona-bá Organizasaun Mundial Komérsiu (OMK).
Papél media iha adezaun Timor–Leste ba OMK mak habelar informasaun kona–bá adezaun Timor–Leste nian ba OMK ba públiku, liu–liu ba setor privadu kona-bá importánsia hosi adezaun ne’e rasik.
Timor-Leste presiza fó prioridade ba Adezaun tanba Timor-Leste adota merkadu livre hahú hosi restaurasaun independensia, maibé seida’uk iha medida ne’ebé efisiente no efikas hodi reforsa no fasilita setór privadu, tanba sistema burokrasia públiku ne’ebé naruk no dala barak la transparente.
Timor-Leste presiza fó prioridade ba adezaun, tanba prosesu adezaun sai hanesan meiu hodi identifika lakuna iha dezenvolvimentu no reforma doméstika, infrastrutura, rekursu umanu, no lejizlasaun.
Ho nune’e, hanesan nasaun menus dezenvolvidu (LDC, sigla-ingles), Timor-Leste sei hetan privileiju ba assisténsia no kapasitasaun másimu durante preparasaun adezaun ba OMK, hosi Sekretariadu membru OMK no hosi parseiru devenvolvimentu sira.
Timor-Leste sei hetan parseiru dezenvolvimentu no sei fornese mós asisténsia no kapasitasaun ba setór privadu hodi bele prepara didi’ak ba integrasaun iha merkadu global. Timor-Leste sei hola parte no hetan asesu ba iha sistema komérsiu globál, ho regra no prosedimentu ne’ebé transparante no iha akontabilidade ne’ebé mak sei fó kontribuisaun boot ba dezenvolvimentu no diversifikasaun ekonomia nasionál.
Diversifikasaun ekonmoia nasionál ne’e, liuhosi dezenvolvimentu iha área xave sira hanesan; dahuluk rekursu humanu kapasitadu tuir área espesilizada sira; Enkuadramentu legál sira; Melloramentu ba infranstrutura nasionál no jestaun ne’ebé liga ba sistema komérsiu; no dahaat konfiansa hosi investór nasionál no internasionál atu halo investimentu iha Timor-Leste no bele asesu merkadu mundiál.
Jornalista : Nelia Fernandes
Editór : Cancio Ximenes
