DILI, 02 outubru 2021 (TATOLI) – Iha sabádu lorokraik, loromatan nia roman mós mihis daudaun. Maske nune’e, la hamihis espiritu kompetisaun VDL (Vale de Lahane) nian. Nune’e konsege lori rezultadu pozitivu ida ba nia adeptu sira, iha jornada terseiru iha Liga Feto Timor (LFT).
Iha jogu entre FC VDL ho Na’in Feto FC, iha kampu Federasaun Futeból Timor – Leste (FFTL), Dili, ekipa VDL fura guarda-rede Na’in Feto FC ho eskore neen (6). Enkuantu, Na’in Feto FC tenke simu konsekuénsia ida: derrota. Na’in Feto FC derrotadu tanba hahú jogu to’o ramata nunka prodús golu ruma. Zero. VDL vs Na’in Feto FC, rezultadu 6-0. Nune’e, VDL festa golu ba Na’in Feto FC.
Husi rezultadu koletivu ne’e, VDL indiskutivel ka iha direitu absoluta hetan klasifikasaun atu hetan pontu tolu hodi aumenta sira-nia valór iha tabela klasifikasaun Segunda Divizaun nian.
Bainhira minutu primeiru hahú, ekipa rua hanesan baibain tenke halo kontra ho atake ba malu tuir tékniku ida-idak nian hodi prodús golu.
Husi tékniku no abilidade ne’ebé jogadór no ekipa rua ne’e, idaidak halo, VDL nian lori rezultadu di’ak tanba iha minute 1 Jogadora Eufrajia konsege fura ona rede Na’in Feto nian hodi lori rezultadu ba 1-0. Jogu komesa manas liután ba ekipa rua. Adeptu sira mós entuziasmu hein golu. Maibé, VDL iha kapasidade domina bola no iha estratéjia maka’as hodi kombate atake hirak ne’ebé Na’in Feto lansa.
Nune’e iha minute 5, Jogadora Natacia Pereira marka tan golu ida hatuur rezultadu ba 2-0. Hosi golu ne’e hasa’e liután Na’in Feto nia emosaun jogu maibé la hatudu rezultadu pozitivu hodi bele oferese golu ba ekipa.
Bola halai no semo ba mai iha kampu loron, husi pasajen no sutu husi ekipa rua ne’ebé sai adversáriu ba malu. Tanba ne’e, iha minutu ’40, ’47, ’48 no ’90, Jogadora Eufrajia hetan oportunidade di’ak hodi marka golu ba Na’in Feto nune’e hatuur rezultadu metin ba 6-0 to’o jogu termina laiha tan golu ruma mak akontese.
Enkuantu esforsu barak mak Na’in Feto halo laiha rezultadu tanba esforsu hirak ne’e hela de’it hanesan esforsu no Vitória metin ba VDL nia liman.
Jornalista: Hrotencio Sanchez
Editór: Rafy Belo
