DILI, 04 outubru 2021 (TATOLI)–Ministériu Finansa (MF) liuhosi Sekretariadu Tékniku Fundu COVID-19, simu ona lista pesoál liña frente ne’ebé presta servisu ba mitigasaun COVID-19 hosi instituisaun haat ba pagamentu suplementu remuneratóriu.
Instituisaun haat ne’e mak hanesan Ministériu Administrasaun Estatál (MAE), Ministériu Interiór (MI), Polísia Nasionál Timor-Leste (PNTL), no Sala Situasaun Sentru Integradu Jestaun Krize (CIGC, sigla portugés).
“Ami simu lista dahuluk hosi MAE, sira iha lista rua kompostu hosi funsionáriu esensiál no lista hosi autoridade lokál, maibé lista hosi funsionáriu esensiál MAE nian, ami devolve fila 300-resin tanba la priense rekezitu no lista benefisiáriu ba autoridade lokál, Sekretariadu Téniku Fundu COVID-19 simu ona no halo hela koordenasaun tékniku ho MAE hodi kompleta dokumentu balun hodi asegura prosesu pagamentu,” Koordenadór Jerál Sekretariadu Tékniku Fundu COVID-19, Ernesto da Conceição Silva, informa ba Agência TATOLI, via telefónika, segunda ne’e.
Notísia relevante: PR promulga alterasaun daruak ba dekretu-lei suplementu remuneratóriu
Nune’e mós, Ministériu Interiór (MI), ninia lista ne’ebé submete maioria funsionáriu de’it no la’ós liña frente, nune’e Sekretariadu Fundu COVID devolve fila.
Enkuantu Servisu Migrasaun iha lista ketak ne’ebé sekretariadu simu ona no presiza verifika dokumentu balun hanesan konta bankária, ne’ebé daudaun ne’e iha hela koordenasaun tékniku kuandu dokumentu kompleta ona bele halo pagamentu no lista hosi PNTL foin submete iha segunda (04/10) ne’e.
“Lista hosi CIGC ami simu ona, ne’ebé totál ema 476, fahe ba rua, liña frente na’in-449 no kazuál 27. Sekretariadu Tékniku komfirma ona ho Diretora iha Gabinete Primeiru-Ministru nian no manda ona dokumentu balun hodi kompleta, nune’e kuandu kompleta ona bele halo ona pagamentu, ne’ebé lista hosi CIGC laiha ida mak devolve, tanba hotuhotu prienxe kritériu,” Koordenadór Jerál ne’e dehan.
Verifika ba dokumentu sira ne’e lori tempu loron-tolu de’it, maibé depende ba dokumentu sira, kuandu seidauk kompleta, bele devolve fali ba instituisaun.
Notísia relevante: MF simu lista liña frente instituisaun rua ba suplementu remuneratóriu
Kona-ba FALINTIL-Forsa Defeza Timor-Leste (F-FDTL) to’o agora seidauk, maski Sekretariadu Tékniku konvoka ona reuniaun tékniku dala-rua ona no halo sosializasaun dekretu-lei ne’e rasik maibé to’o agora sira seidauk submete lista inklui ministériu balun.
“Kona-ba define kalkulasaun montante, tanba Sekretariadu Tékniku labele siik de’it, se laiha kalkulasaun ami la barani halo pagamentu, se lae ikus mai bele dehan ami mak inventa montante,” nia akresenta.
Jornalista : Antónia Gusmão
Editora : Julia Chatarina
