DILI, 05 outubru 2021 (TATOLI)—Diretór klíniku Ospitál Nasionál Guido Valadares (HNGV) Marcelino Correia hateten, to’o oras ne’e Governu hakotu ona serka sanitária maibé Ospitál Nasionál Guido Valadares (HNGV) implementa nafatin triajen ba pasiente sira hodi prevene moras COVID-19.
“Atendimentu iha Opsitál Nasionál Guido Valadares (HNGV) la’o normál hanesan baibain ba pasiente sira maibé nafatin halo triajen tanba objetivu triajen mak oinsá buka hetan ema ne’ebé mak ho moras COVID-19 atu nune’e prevene la bele sai boot liután,” Diretór klíniku HNGV, Marcelino Correia ba jornalista sira iha HNGV, ohin.
“Agora serka sanitária mós Governu hakotu ona no ita-nia servisu atendimentu la’o normál maibé la sees husi buat ne’ebé mak ita halo bebeik hanesan prevensaun kontinua entermu fase-liman ho sabaun. Ida ne’e mak HNGV aplika nafatin to’o agora,” Ezekutivu ne’e hatutan.
Tanba ne’e, nia husu ba vizitante sira bainhira atu vizita pasiente sira iha ospitál laran tenki liuhusi triajen atu nune’e prevene moras husi ema ida ba ema seluk.
“Agora kona-ba okupasaun kama sira sei nafatin menus. Ema ladun prienxe barak bainhira ita iha serka sanitária. Maibé, pasiente balun mai konsulta iha ne’e hanesan baibain maioria sira konsulta iha OPD, medisina interna, depois iha indikasaun ruma mak presiza atendimentu ne’ebé di’ak hafoin transfere ba laran maibé ita halo prevensaun nafatin ba moras COVID-19,” Marcelino Correia informa.
Kona-ba atendimentu operasaun ba kazu planeadu, tuir Diretór Klíniku HNGV, Marcelino Correia, antes ne’ e suspende tanba atende de’it ba kazu emerjénsia maibé agora loke fila fali ona tanba kazu COVID-19 menus. “Entaun atendimentu ba operasaun normál ba sira ne’ebé mak iha indikasaun atu halo opera tanba médiku sira sufisiente atu atende kazu sira ne’e”.
Notísia relevante:Sentru Saúde Becora Kontinua Implementa Sistema Triajén ba Pasiente
Jornalista: Felicidade Ximenes
Editór: Rafy Belo
