DILI, 07 outubru 2021 (TATOLI)–Komisáriu Autoridade Aduaneira (AA)/Alfándega, José António Fátima Abílio, hateten, foin lalais realiza ona lansamentu ba implementasaun janela únika nasionál ho Sekretaria Estadu Ambiente (SEA).
“Sekretaria Estadu Ambiente koopera tebes ho ami atu halo konfigurasaun ba ASYCUDA World, ne’ebé iha relasaun ho plástiku no gás, hodi ita bele konfigura hotu iha sistema, nune’e alerta kedas bainhira empreza ruma iha tendénsia hatama sasán la kumpre rekezitu ambiente,” Komisáriu Alfándega informa ba Agência TATOLI, kinta ne’e.
Objetivu konfigurasaun ho sistema ASYCUDA World hodi kontrola di’ak liután movimentu importasaun materiál plástiku liuhosi sistema automatizadu, nune’e bele kondena entidade balun ne’ebé la kumpre rekezitu no bele aplika penalidade.
“Sistema ASYCUDA World daudaun Alfándega no SEA uza ona atu halo kontrolu ba importasaun gás no plástiku,” nia akresenta.
Notísia relevante: SEA-Alfándega koopera proibe importasun embalajen uzu úniku
Relasiona ho loja sira kontinua uza saku plástiku, tuir Komisáriu ne’e, akontese tanba importadór sira hatama sasán (plástiku) hamutuk ho sasán sira seluk (sikat le’et), tanba ne’e Alfándega la konsege identifika.
“Atu kontrola di’ak liu importasaun plástiku, presiza iha servisu integradu ida no tenke servisu maka’as atu rona informasaun sira hosi parte intelejénsia sira,” nia subliña.
Tuir kódigu aduaneiru, aplika penalidade kiik liu $250 no boot liu entre $3.000 to’o $5.000 bainhira iha infrasaun ruma.
Jornalista : Antónia Gusmão
Editora : Julia Chatarina
