DILI, 08 outubru 2021 (TATOLI)–Prezidente Repúblika, Francisco Guterres Lú Olo, husu ba diplomata sira katak asaun diplomátika sira iha tasi-balun tenke korresponde ho nesesidade interna país ninian.
Prezidente Repúblika, sesta ne’e fó posse ba Embaixadór Timor-Leste nian ba Reinu Tailándia, Juvêncio de Jesus Martins, Reino Béljika Jorge Trindade Neves de Camões, Repúblika Indonézia Filomeno Aleixo da Cruz, Repúblika Mozambique Francisco Miranda Branco no ba Malázia Joana Veneranda Amaral.
“Asaun diplomátika, dezenvolve iha país idak-idak, tenke korresponde ba nesesidade interna ita-nia país. País investe iha diplomasia fatia ida razoável husi orsamentu jerál Estadu. No sai óbviu katak ida ne’e ejize autór sira- diplomata sira, fó enfaze ba Embaixadór sira atu kumpri sira-nia misaun,” Prezidente Repúblika hateten iha ninia diskursu iha serimónia pose ba Embaixadór Timor-Leste nian ba nasaun lima, liuhosi komunikadu imprensa ne’ebé Agência TATOLI asesu.
Nomeasaun ba Embaixadór sira hatudu konfiansa Prezidente Repúblika nian no Governu ne’ebé fó emposada. Prezidente Repúblika fiar katak ho orientasaun hosi Ministériu Negósiu Estranjeiru embaixadór sira sei esplora oportunidade iha país idak-idak ba benefísiu Timor-Leste nian.
Embaixadór Juvêncio de Jesus Martins, diplomata karreira, uluk sai Embaixadór Timor-Leste nian ba Malázia, no mós akreditadu ba Vietnam no Myanmar. Ikusliu sai Embaixadór Timor-Leste nian ba Filipina. Embaixadór ezerse funsaun diplomátika iha Indonézia.
Embaixadór Jorge Trindade Neves de Camões, diplomata karreira. Sai joven diplomata na’in-tolu dahuluk nian iha Timor-Leste, destaka iha Jakarta, Indonézia, hafoin referendu iha 1999. Ezerse funsaun oioin iha MNEK no funsaun serbisu perifériku esternu. Sai Sekretáriu Jerál MNEC ba dala-rua. Nomeadu ba Embaixadór Timor-Leste nian iha Vietnam, ba tinan-haat. No iha koñesimentu klean ba assuntu ASEAN nian.
Embaixadór Filomeno Aleixo da Cruz, sai Embaixadór Timor-Leste nian ba Japaun hosi 2016-2019. Sai Vise-Ministru Administrasaun Estatal husi I no II Governu Konstitusionál. Formadór ba kuadru, konsultór no fasilitadór ba asaun formasaun iha Institutu Repúblikanu Internasionál husi Estadu Unidu.
Embaixadór Francisco Miranda Branco, hahú envolve iha atividade polítika ho otas nurak tebes hafoin revolução dos cravos akontese iha Portugal 1974. Kompleta nia estudu iha Liceu Dr. Francisco Machado no hahú serbisu nu’udar funsionáriu públiku iha Serviços de Planeamento Económico e Estatística, Provinsia Ultramarina Timor. Dezde 2001 nu’udar Deputadu asume responsabilidade oioin.
Embaixadora Joana Veneranda Amaral, envolve barak iha kampu edukasaun nian. Envolve iha projetu ne’ebé iha relasaun ho Timor-Leste no Japaun, iha ámbitu Centro Cultural Timor-Leste-Japão. Sai profesora iha eskola sekundária Fuiloro no Diretora Administrasaun no Jestora Rekursu Korporativa ba empreza Konsultadoria.
Ba Embaixadór na’in-lima ne’ebé simu posse ohin, Prezidente Repúblika dezeja susesu ba funsaun nu’udar reprezentante diplomátika Timor-Leste nian.
Iha 07 outubru 2021, liuhosi Dekretu Prizedente Repúblika, Prezidente Repúblika nomea Embaixadór Timor-Leste ba Tailandia, Béljika, Indonézia, Mocambique no Malásia.
Jornalista : Evaristo Soares Martins
Editór : Cancio Ximenes
