DILI, 08 outubro 2021 (TATOLI)-Institutu Nasionál Siénsia no Teknolojia (INCT-sigla portugés), husu tan orsamentu adisionál husi OJE 2022 ho montante rihun $460 hodi kria dezeñu atu harii edifisiu foun ba instituisaun nian iha futuru.
Prezidente Konsellu Ezekutivu INCT, José Cornelio Guterres hateten nia parte simu ona envelope fiskál 2022 nian hamutuk rihun $417, maibé kalkúlu la sufisiente atu ezekuta iha tinan oin, tanba ne’e husu tan adisionál hamutuk rihun $460.
“Ita hamosu proposta adisionál ne’e tanba atu prepara mós dezeñu edifisiu foun INCT nian ne’ebé atu hari’i iha área Bairo-Pite iha edifisiu Palasiu PR nian kotuk,” José Cornelio Guterres, hateten iha ninia servisu fatin, sesta ohin.
Planu no prioridade ba tinan 2022 nian, sei konsentra ba reforsa planu peskiza, prepara kriasaun depozitóriu tanba prosesu estudu agora la’o hela, inklui prepara dezeñu atu instala edifisiu foun ba INCT.
Kona-ba edifisiu foun ne’e, INCT hetan ona rai husi Dirasaun Nasionál Terras Propridade (DNTP) Ministériu Justisa iha área edifisiu Palasiu Prezidente nia kotuk.
Jornalista : Tomé Amado
Editór : Agapito dos Santos
