DILI, 13 outubru 2021 (TATOLI)–Banku Nasionál Komérsiu Timor-Leste (BNCTL, sigla portugés) identifika kliente banku ne’ebé uza kartaun Automated Teller Machine (ATM) P24 menus, nune’e implika ba sistema atendimentu iha balkaun sukursál.
“Maski BNCTL halo promosaun hodi enkoraja kliente uza kartaun, maibé vontade kliente uza kartaun ATM 24 menus tebes. Informasaun ne’ebé ami simu dehan fee P24 ne’e boot, maibé ha’u bele dehan hanesan de’it, diferente mak iha sentavu lima de’it, balun mós dehan katak uza kartaun ATM nian fasil liu,” Diretór Ezekutivu BNCTL, Brígido de Sousa, relata ba Agência TATOLI, iha ninia knaar fatin, Mandarin, kuarta ne’e.
Maski nune’e, BNCTL husu nafatin kliente sira atu atualiza ATM P24, nune’e bainhira halo tranzasaun osan iha mákina ATM mak banku nasionál ne’e avaria ka ema barak, bele ba iha mákina ATM seluk hanesan BRI, BNU no MANDIRI.
Jestór banku ne’e konfesa, durante ne’e simu krítika barak ligadu ho funsionamentu mákina ATM, maibé iha fatór barak mak provoka normalidade mákina sira.
“Tranzasaun iha ATM BNCTL barak liu banku seluk, kada fulan ami bele halo tranzasaun ne’e kuaze millaun $20. Tanba ne’e, dala ruma ema mamuk iha banku ATM banku seluk, maibé BNCTL sempre iha, signifika katak utilizasaun mákina barak, ne’ebé dala ruma bele falla, hanesan akontese mós osan tuan nune’e halo tranzasaun susar, tanba osan ne’ebé hatama ba mákina ne’e labele tuan liu no labele foun liu,” Responsável banku esklarese.
Aleinde ne’e, problema liña internet dala ruma monu, lori impaktu ba funsionamentu mákina ATM.
“Nune’e mós la’ós kliente BNCTL hotu hatene uza ATM, tanba daudaun ne’e ami introdús ona kartaun ATM ba benefisiáriu idozu no veteranu sira, entaun dala ruma sira seidauk abitua uza kartaun no bele mosu fallansu,” Brígido de Sousa akresenta.
Notísia relevante: Evita forma naruk, BNCTL promete atribui kartaun ATM ba idozu
Difikuldade seluk maka fasilidade mákina balun presiza hadi’a no ekipamentu sira tenke sosa iha rai-liur.
“Iha situasaun pandemia, susar atu hatama sasan sira. Tanba utilizasaun mákina ATM ne’e barak, iha situasaun COVID-19 difisil ba ami tanba ekipamentu mákina balun ladi’ak. Ha’u rekoñese iha duni problema, ami simu keixa tanba fallansu banku nian tanba falla monitorizasaun, maibé ami esforsu atu hadi’a ho sujestaun sira hotu,” nia rekoñese.
Daudaun ne’e mákina ATM BNCTL iha Dili hamutuk 22 no parte banku atribui ona kartaun ATM P24 ba kliente 2.000.
Jornalista : Antónia Gusmão
Editora : Julia Chatarina
