BAUCAU, 16 outubru 2021 (TATOLI)—Muzeu Rezisténsia Timorense (AMRT) finaliza ona reabilitasaun abrigu kombatente ba luta libertasaun hamutuk 14, ne’ebé maioria iha rejiaun kuatru.
“Tanba expansaun luta armada nian ba rejiaun kuatru no fatin esplanada (ai-laran) ne’ebé atu subar la garante, entaun Komandu deside halo abrigu iha responsável família nia uma,” Diretór Ezekutivu no Prezidente AMRT, Hamar Antóninho Baptista Alves, hateten, iha suku Ossoala, postu administrativu Vemasse, munisípiu Baucau, sábadu ne’e.
Notísia relevante: AMRT rekolla dokumentu rezisténsia atu prezerva istória luta ba libertasaun
Reabilitasaun abrigu hirak ne’e sei kompleta tan instalasaun balun atu transforma ba mini muzeu no sei akompaña hakerek livru atu prezerva istória ho títulu ‘trilhas da resistência’, ne’ebé iha faze finál.
Bainhira finaliza, iha kada abrigu sei instala mini muzeu hodi kompleta fasilidade, nune’e fasilita bainhira públiku halo vizita no bele asesu ba istória ne’ebé eziste, nune’e mós sai fatin aprendizaje ba estudante sira bainhira halo vizita.
Enkuantu, abrigu neen seluk sei iha faze levantamentu dadus no tuir planu tinan 2022 mak halo dezeñu, enkuantu tinan 2021 hatama planu ba abrigu neen no hela 12.
“Ita garante katak tinan 2022 bele finaliza ona,” Hamamar argumenta.
Hosi abrigu 14 ne’ebé iha, abrigu sia mak instala iha rejiaun kuatru, enkuantu iha munisípiu Dili finaliza ona ida no hela rua mak iha Lahane, ne’ebé AMRT rasik hasoru difikuldade tanba sei kontaktu ho na’in ba uma no ida tan mak agora identifika ona hanesan subar fatin Jenerál Taur Matan Ruak (atuál Primeiru-Ministru), ne’ebé iha faze levantamentu tékniku.
Seluk tan, abrigu iha Same, ne’ebé uluk sai subar fatin Komandante em Xefe, Xanana Gusmão, ne’ebé iha mós faze levantamentu estudu tékniku no restu hanesan Laclo, Remexio, no Mehara halo dezeñu hotu ona.
Iha estimasaun kustu ba reabilitasaun purvolta $30.000-resin ba kada abrigu, ne’ebé ho montante la hanesan tanba balun purvolta $20.000-resin, ne’ebé tanba edífisiu tomak tama iha faze reabilitasaun.
“Jerálmente, bele garante katak iha tinan 2023, abrigu sira tama ona ba faze finál reabilitasaun,” Prezidente AMRT akresenta.
Jornalista : Natalino Belo
Editora : Julia Chatarina
