Irrigasaun rua iha suku Ossuala abandona tinan barak
BAUCAU, 16 outubru 2021 (TATOLI)-–Irrigasaun rua Dastainuta ho Kaumira iha suku Ossuala, postu administrativu Vemasse, munisípiu Baucau, ne’ebé antes ne’e konstrui ho Orsamentu Jerál Estadu tinan 2015, daudaun abandona no labele fornese bee ba natar.
“Irrigasaun Dastainuta ho naruk kilómetru ida-resin, desde halo inaugurasaun to’o agora la utiliza tanba konstrusaun laiha kualidade no bee la sulin ba natar, enkuantu irrigasaun seluk Kaumira, konstrui ho naruk metru atus ida, konsege utiliza duni tinan-rua, maibé ho ambiente rai monu hanehan iha leten, nune’e bee labele sulin ba natar no komunidade atu kee maibé labele tanba konstrusaun ne’ebé iha antes ne’e fui metin ona ho semente,” Xefe suku Ossuala, Filipe Zeferino Correira, hateten ba Agência TATOLI, iha Ossuala, sábadu ne’e.
Konstrusaun irrigasaun rua hodi fornese bee ba natar ektare 40-resin, ne’ebé antes ne’e utiliza de’it irrigasaun tradisionál.
Suku Ossuala iha natar besik ektare 300-resin no agrikultór sira iha suku ne’e sempre kuda haree kada tinan, iha tempu bailihun no rezultadu produsaun depende ba klima, no produtu agíkola ne’ebé prodús balun abitante sira konsumu no seluk fa’an iha merkadu hodi hetan rendimentu.
Notísia relevante: MAP Baucau planeia konstrui irrigasaun fazeadamente
Kona-ba preokupasaun ne’e, parte autoridade lokál hato’o ona proposta ba nível munisipál maibé seidauk hetan resposta to’o agora.
“Ami hato’o ona ba orgaun kompetente munisípiu, maibé to’o agora seidauk iha resposta tanba orsamentu laiha,” nia akresenta.
Suku Ossuala iha aldeia lima, kompostu hosi Caidenulale, Hoineuwai, Lolinunu, Waiknasa, no Umaiku, ho totál populasaun hamutuk 2.339, hosi uma-kain 503, ne’ebé maioria populasaun moris nu’udar agrikultór no suku ne’e iha potensialidade ba natar, produtu agríkola no pekuária
Jornalista : Nelson de Sousa
Editora : Julia Chatarina
