DILI, 18 outubru 2021 (TATOLI)–Governu liuhosi Ministériu Defeza (MD) ho koordenasaun Ministériu Interiór (MI) planeia ona atu halo rekrutamentu konjunta ba membru FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL).
Tanba ne’e, Ministru Defeza, Filomeno de Jesus Paixão, hasoru malu ho Primeiru-Ministru (PM) no Ministru Interiór, Taur Matan Ruak, hodi halo koordenasaun molok implementa planu.
“Ha’u mak husu atu enkontru ho Primeiru-Ministru, husu orientasaun ruma ba serbisu ne’ebé ha’u halo, partikularmente kona-ba rekrutamentu ne’ebé envolve PNTL no F-FDTL, pelu menus durante tempu sira hamutuk bele aprende valór no prinsípiu komun durante fulan-rua,” Ministru Filomeno relata hafoin hasoru Ministru Interiór, iha Rezidénsia Farol, segunda ne’e.
Governante ne’e akompaña, desde tinan 2006 to’o agora, entre entidade rua ne’e mosu kompetisaun no dezentendimentu.
“Entaun Governu halo oinsá atu durante tempu balun sira hamutuk, bele koñese malu, liuliu aprende disiplina jerál ida-ne’e tenke hamutuk, kona-ba formasaun espesializada mak tau ketak. Maibé konseitu ne’e seidauk hotu, ha’u mai husu de’it orientasaun balun hosi Primeiru-Ministru no fulan ne’e ramata, ha’u aprezenta ba Konsellu Ministru, ha’u-nia dezeju iha tinan oin ne’e bele implementa, no rekrutamentu ne’e iha karik rekruta dala-ida de’it, hafoin fahe fali,” nia esklarese.
Tanba ne’e, Komandu F-FDTL aprova ona planu rekruta membru foun hamutuk 600 iha tinan 2022, enkuantu parte PNTL nian mak sei halo koordenasaun.
Notísia relevante: Rekrutamentu F-FDTL turnu daruak 2022 depende ba orsamentu
“Tanba ne’e, planu rekrutamentu konjunta sei implementa iha tinan 2023. Loos duni iha proposta Orsamentu Jerál Estadu (OJE) 2022 ne’e prevee ona osan ba rekrutamentu forsa hamutuk 600 no aprovadu ona. Prosesu rekrutamentu ne’e maka karik seidauk liu fulan-neen bele foti fali sira ne’ebé apuradu ona, nune’e bele kuidadu didi’ak sira-nia saúde hodi bele bolu fali de’it,” nia akresenta.
Biban ne’e, Ministru husu mós orientasaun hosi Xefe Governu ba destakamentu konjunta iha fronteira, ne’ebé la’ós F-FDTL no PNTL de’it, maibé envolve mós instituisaun seluk hanesan Ministériu Administrasaun Estatál (MAE), Sekretaria Estadu Protesaun Sivil (SEPS), no instituisaun seluk.
“Ami diskute hamutuk ona no halo hela konseitu, ne’ebé iha fulan-ne’e nia rohan sei lori aprezenta iha Konsellu Ministru,” nia dehan.
Jornalista : Antónia Gusmão
Editora : Julia Chatarina
