DILI, 22 outubru 2021 (TATOLI)–Eskola Ensinu Sekundáriu Jerál (ESJ) 4 setembru UNAMET Balide halo ona levantamentu dadus estudante iha eskola ne’e hamutuk 2.000, ho idade 12 to’o 17 mak preparadu atu simu vasina Pfizer iha loron 27 outubru.
Adjuntu Diretór ESJ 4 setembru UNAMET Balide, Cancio Soares, informa, dadus estudante preparadu ona, maibé daudaun presiza de’it konfirmasaun parte inan-aman atubele akompaña oan sira iha tempu vasina.
“Ami hasoru malu ona ho parte saúde, bainhira mai halo kampaña advokasia ba mestre sira. asuntu importante ne’ebé sira (saúde) toka maka bainhira labarik sira simu vasina, inan-aman sira tenke akompaña oan sira,” Adjuntu eskola hateten ba Agência Tatoli, ninia knaar fatin, eskola 4 setembru, Balide, sesta ne’e.
Notísia relevate: MEJD-MS halo advokasia vasinasaun Pfizer ba manorin iha Cristo Rei
Aleinde akompaña oan sira, inan-aman mós tenke asina deklarasaun atu esplika kondisaun oan sira karik balun moras, atu nune’e parte saúde bele hatene no buka solusaun.
Enkuantu, parte eskola mós trasa ona planu atu halo enkontru entre Diresaun Ensinu Sekundáriu Ministériu Edukasaun Juventude no Desportu (MEJD) hamutuk ho Ministériu Saúde (MS) no inan-aman sira, ne’ebé enkontru ne’e sei realiza iha sábadu (23/10).
Iha enkontru ne’e, inan-aman sira sei hetan esplikasaun klaru kona-ba vasina Pfizer, nune’e bainhira lansa vasina ne’e labele iha dúvida.
Jornalista : Tomé Amado
Editora : Julia Chatarina
