DILI, 28 outubru 2021 (TATOLI)–Ministru Edukasaun Juventude no Desportu (MEJD), Armindo Maia, iha kinta ne’e, rona aprezentasaun hosi Komité Diretiva Programa Setór Edukasaun (KDPSE) kona-ba planu serbisu hodi dezenvolve edukasaun Timor-Leste iha tinan 2022.
“Ha’u laiha objesaun atu la konkorda saida maka komité aprezenta, buat ne’ebé sira hato’o atu dezenvolve setór edukasaun, liuliu ba labarik sira iha ensinu báziku. Ha’u prontu atu aprova rekomendasaun sira ne’ebé ekipa aprezenta,” Ministru Armindo hateten iha edifísiu MEJD, Villa-verde.
Iha sorin seluk, Diretór Nasionál Ensinu sekundáriu Jerál-MEJD, Luís Fernandes, esplika katak planu serbisu ba tinan oin foku ba dezenvolvimentu labarik iha Timor-Leste.
“Planu atividade serbisu ba tinan 2022 mak hanesan atividade edukasaun inkluziva, ne’ebé sei hetan orsamentu hosi MEJD ho montante $25.000, ne’ebé sei fahe hodi uza ba atividade rua hanesan implementasaun ferramentu funsionalidade labarik ho montante $20.000 no atividade inkluzaun jéneru ho kustu $5.000,” nia akresenta.
Enkuantu, fundu hosi Department of Foreign Affairs and Trade (DFAT) no programa Parseria ba Dezenvolvimentu Humanu (PHD) hosi Austrália atu apoiu programa edukasaun inkluziva ho montante $172.070, ne’ebé hosi fundu ne’e sei hasai $123.320 hodi apoiu atividade inkluzividade defisiénsia ho kustu $48.750 ba programa igualdade jéneru.
Nune’e mós, programa edukasaun multi lingua (EMULI) tinan ida hetan alokasaun orsamentu hosi MEJD ho totál $86.720, ne’ebé sei uza hodi hala’o atividade rua hanesan formasaun $50.000 no saláriu manorin na’in-15 hamutuk $36.720.
Fundu hosi DFAT no programa PHD hosi Austrália atu aselera programa EMULI ho totál $160.714, ne’ebé orsamentu ne’e sei kobre ekipa EMULI nia saláriu iha tinan 2022.
Planu no servisu atu apoiu atividade INFORDEPE nian, prevee ona orsamentu $20.000 ba mentor na’in-haat atu apoiu kustu viajen.
Iha mós fundu hosi DFAT no programa PHD hosi Austrália ho montante $62.800, ne’ebé ekipa sei uza fundu ne’e hodi kobre kustu viajen ba mentor nasionál na’in-rua ba faze 6 iha munisípiu Covalima ho totál fundu $17.280.
Tuir mai ekipa sei uza mós fundu $14.400 ba mentor nasionál na’in-rua ba kustu viajen faze 7 iha munisípiu Manatutu no Liquiçá.
Ekipa sei uza fundu $21.120 ba atividade INFORDEPE atu fasilita formasaun iha programa ALMA ne’ebé sei hala’o iha munisípiu inklui enkontru GTP, iha dezenvolvimentu profisionál sira, inklui fundu $10.000 atu dezenvolve matéria liuhosi koordenasaun ho INFORDEPE.
Jornalista : Tomé Amado
Editora : Julia Chatarina
