Austrália komprometidu kontinua apoia F-FDTL asegura fronteira tasi
DILI, 29 outubru 2021 (TATOLI)— Governu Austrália liuhosi Embaixadór iha Timor Leste, Peter Roberts, hateten, komprometidu kontinua fortifika kooperasaun entre militár Austrália ho FALINTIL Forsa Defeza Timor-Leste (F-FDTL) iha área marítima atubele asegura fronteira tasi.
“Kooperasaun área defeza entre Austrália no Timor-Leste sein duvida ona, tanba Austrália sempre tulun Timor-Leste iha kualker situsaun. Hanesan ita bo’ot sira haree iha situsaun COVID-19 forsa Austrália hamutuk ho F-FDTL apoia ita nian komunidade sira,” Embaixadór Peter, hateten, hafoin hala’o enkontru bilaterál ho F-FDTL, iha Kuartel Jerál, Fatuhada-Dili, sesta ne’e.
Notísia Relevante: TL-Austrália sei halo patrullamentu konjuntu iha Kosta Súl
Governu Austrália mós selebra ona akordu ho Governu Timor-Leste atu apoia ró rua ho kapasidade boot atu bele halo operasaun iha tasi-mane hodi asegura riku-soin tasi.
“Ita nia kooperasaun iha área defeza entre Austrália no Timor-Leste la’o di’ak tanba sempre fó apoia ba malu,” Diplomata Australianu ne’e garante.
Iha biban hanesan, Xefe Estadu Maior F-FDTL, Brigadeiru Jenerál, Calisto Santos “Coliati”, hateten Goveru Austrália hatudu kompromisu apoia F-FDTL iha área seguransa marítima nian.
“Ami ko’alia atu fortifika koperasaun hodi garantia seguransa iha tasi no prepara ita nia ema atu hala’o operasaun iha tasi-mane,”afirma dehan Xefe Maiór Jerál F-FDTL, Bigradeiro Jerál Calisto dos.
Hahú 2001 to’o 2021, Austrália apoia Timor-Leste, hanesan hala’o rekrutamentu dahuluk ba membru F-FDTL, Fasilita formasaun iha akademia militár Australia, ekipamentu administrasaun hanesan komputaór no rádiu komunikasaun.
Alende ne’e, Brigadeiru Jenerál Coliati informa, Austrália mós kompromete atu apoia ró Guardian-class patrol boats ho Speed 20 knots (37 km/h; 23 mph) ba F-FTL iha jullu 2023.
“Austrália iha ona akordu sei apoia ita ho ró rua. Nune’e iha 2019 prepara ona forsa komponente navál na’in-60 tuir treinamentu iha Austrália no Hera oinsá jere operasaun ba ró,” nia konklui
Notísia Relevante: TL-Austrália sei halo patrullamentu konjuntu iha Kosta Súl
Jornalista : Natalino Costa
Editór : Florencio Miranda Ximenes
